• Facebook
  • Twitter
  • Rss
  • Plus

Veciños de Araño denuncian que pasan meses sen auga nos seus fogares

Mar 15 Escrito por 
RIANXO> Uns sesenta veciños do lugar de Pousada, na parroquia rianxeira de Araño, denuncian a falta da auga nos seus fogares, sobre todo, nas épocas de seca. Un enfrontamento coa Comunidade de Montes impídelles realizar as obras que garantan o subministro de auga, aínda que contan xa co permiso de Augas de Galicia.
Manuel é o presidente da Comunidade de Veciños de Pousada, aldea da parroquia rianxeira de Araño. Creouse no ano 2006, precisamente a época á que se remonta esta demanda veciñal. A traída de augas desta zona ten enfrontados ós veciños coa comunidade de montes, que se nega a que estes realicen as obras necesarias nestes terreos, coñecidos como Fonte das Barreias, para facer a captación de augas. Algo imprescindible para este grupo de veciños, xa que o manancial non subministra auga suficientes para os 16 fogares do lugar, preto de 60 persoas. Os veciños e veciñas de Pousada aseguran que non poden seguir vivindo así. O caso foi levado a Augas de Galiica, que tras analizar a situación e escoitar a ambas partes, desestimou as alegacións presentadas polos comuneiros de Araño, e impuxo unha servidume forzosa. Aínda así. Tendo a obriga legal de deixar realizar as obras, os comuneiros están retrasando o proceso facendo constantes alegacións que sempre son desestimadas. O último ó que se opuxeron, é á contía cifrada da indemnización pola expropiación forzosa dos terreos. Un equipo desta canle falou co presidente da Comunidade de Montes en Man Común do Araño, pero este preferiu non facer declaracións e así dar a coñecer a súa versión do conflito. Para os veciños, as explicacións que dan desde a comunidade para a negativa, non son.suficientes. Mentres a situación non se aclara, e aínda coa legalidade do seu lado, estes veciños levan máis de dez anos reclamando un dereito que todos temos, poder contar con auga nos seus fogares tódolos días do ano.
Etiquetado como Barbanza    Rianxo    arano    vecino    Polémica   

Artigos relacionados (por etiqueta)

  • Peor que o ano pasado
    RIANXO> Van alá algo máis de dúas semanas dende o arranque da actividade no libre marisqueo e apenas hai xa recurso nos Lombos do Ulla. Aínda que nun primeiro momento os informes dos propios biólogos da consellería do Mar falaban da presenza de berberecho nos Lombos do Ulla, a situación real é ben diferente, e as escasas capturas están a condicionar este inicio da campaña. Apenas hai berberecho e os profesionais tiran da ameixa xapónica para poder levantar un xornal digno. O peche das concesións marisqueiras en Noia por mor da toxina está a ser unha boa nova para os profesionais rianxeiros, que ben unha lixeira suba na cotización do bivalvo en lonxa. Pero é algo, por desgraza para eles, puntual... Segundo explicou o propio patrón maior, a escasa produtividade nos Lombos do Ulla, vén provocada pola gran cantidade de embarcacións que vén soportando dende hai anos o que dificulta a recuperación das especies.
  • A Plataforma reclama a recuperación dos dereitos dos traballadores da sanidade
    BARBANZA> Ademais das concentracións prepáranse varias xornadas de folga en tódolos servizos do Sergas para os días 2 e 3 de novembro. Esta mañá, ás portas do hospital, persoal do centro hospitalario do Barbanza, atendendo a unha convocatoria da plataforma sindical da Sanidade , conformada pola CIG, CC.OO, UXT, CSIF, SAE e Satse, concentrouse para reclamar un calendario de reunións na que negociar a recuperación progresiva de dereitos perdidos nestes últimos anos polos traballadores. A de hoxe era a primeira das dúas concentracións convocadas. A próxima terá lugar o vindeiro mércores 25. Ademais esta mañá informouse tamén da convocatoria de folga en tódolos servizos do Sergas para os próximos días 2 e 3 de novembro ante a negativa da Xunta a implementar a recuperación dos dereitos dos profesionais da sanidade. Os propios traballadores do hospital barbanzán aseguraron que a Xunta está a incumprir os acordos asinados a este respecto, demandando que nos presupostos de 2018 se inclúa unha partida específica para isto.
  • Un incendio calcina parte da nave de Maxi China en Xarás
    RIBEIRA> A Policía Nacional investiga as posibles causas do lume que se orixinaba esta pasada madrugada e que deixaba cuantiosos danos. Ó redor das tres e vinte desta pasada madrugada producíase un aviso ó servizo de Emerxencias do 112 por un posible incendio na nave de Max China en Xarás. Ata o lugar desprazáronse efectivos dos parques de bombeiros de Ribeira e Boiro, que iniciaron os labores de extinción das lapas. Esta mañá unha dotación de retén dos bombeiros cun vehículo nodriza continuaba na zona, realizando labores de control e refrixerado, para que o lume non volvera a reactivarse. Ata a zona tamén se achegaron membros da policía científica da Policía Nacional, que se encarga da investigación, co fin de esclarecer as posibles causas do incendio. As primeiras hipóteses apuntan a que puidera ser intencionado.
  • A Xunta investirá uns sete millóns de euros nos pantaláns para mexilloeiros en Cabo de Cruz
    BOIRO> O alcalde, Xoán Xosé Dieste, confirmou a existencia dunha partida reservada de 1’7 millóns de euros nos presupostos autonómicos do ano que vén para iniciar xa a súa construción. Sen dúbida tratábase dunha das maiores demandas dos diferentes gobernos municipais que durante estes anos pasaron pola alcaldía boirense, que por unha ou outra razón nunca chegaba a executarse. Segundo o alcalde, Xoán Xosé Dieste, a actuación verase finalmente cumprida o ano que vén grazas á aportación do Goberno Autonómico. Nos presupostos de 2018 inclúese unha partida inicial de 1,7 de millóns dos preto de sete nos que está presupostado o proxecto. Dieste destacou a importancia desta obra, dado o peso do sector bateeiro na localidade, e a importancia das mesmas de cara á reordenación dos espazos portuarios. A actuación sumarase a outras importantes melloras xa realizadas, ou que están a piques de rematar, como é o caso da instalación dos pantaláns para as embarcacións marisqueiras no que se investiron uns setecentos mil euros ou obras de conservación e mantemento na explanada portuaria por valor de máis de 40 mil euros.
  • O BNG esixe solucións ante unha nova vertedura no río Listres
    RIBEIRA> Para os nacionalistas a actitude do goberno local non está a ser a apropiada, acusándoo de actuar con pasividade ante esta problemática. Atendendo a unha denuncia dos propios veciños da zona, o BNG vén de facerse eco dun novo vertido de augas residuais no río Listres, nos Areeiros. Segundo os nacionalistas o foco do problema parece ser, unha vez máis, o aliviadoiro do tanque de tormenta existente no lugar. O BNG criticou a pasividade do Concello con este problema e as escasas solucións que se lles están a dar ós veciños afectados. A través dun escrito presentado no Concello, o BNG pídelle ó goberno local que solicite a Augas de Galicia o informe realizado sobre esta vertedura e se ten pensado esixir algunha responsabilidade a quen corresponda por este suceso.
  • O Barbanza sofre tamén o 'domingo negro' de lumes
    BOIRO> O incendio afectou a varias zonas da parroquia de Cures. Durante a tarde-noite chegou a activarse a situación dous debido á proximidade das lapas ás vivendas. Un dos primeiros focos producíase na zona da Figueira. Ó mediodía, a columna de fume e lapas, avanzaba a velocidade de vertixe pola serra do Barbanza, axudada polas altas temperaturas e a forza do aire. Os medios terrestres apenas podían facer nada nesa zona de difícil acceso, e os aéreos, tampouco, debido ás condicións de vento existente. Ás nove da noite a situación empeorou. Nese tempo e segundo as primeiras estimacións de Medio Rural levaban ardidas xa máis de noventa hectáreas. Xa era, sen dúbida, o maior incendio dos que se levan rexistrado na comarca no que vai de ano. O lume estaba totalmente incontrolado e a situación facíase, cada vez, máis complicada xa que as lapas aproximábanse a varios núcleos de vivendas como é o caso de Balteiro e Lidón. Foi nese momento, entrada xa a noite cando se decretou o nivel de alerta dous debido á proximidade do lume a casa. Para os veciños deste último núcleo boirense foron momentos de gran tensión e medo, xa que as lapas avanzaban cara as súas casas. A pesar do medo vivido, non houbo que lamentar danos persoais, e tampouco tiveron que desaloxar as súas vivendas, grazas ó traballo dos equipos de emerxencias, que pasaron toda a noite na zona. O incendio de Cures non foi o único que se rexistraba esta pasada fin de semana no Barbanza. En Ribeira producíanse tamén varios lumes, aínda que a menor escala, que afectaron á zona de salmón, en Oleiros, e tamén a Palmeira, obrigando a mobilizar a estas dúas zonas a varios equipos de extinción.
HomeBARBANZA - NOIAVeciños de Araño denuncian que pasan meses sen auga nos seus fogares Top of Page

Síguenos en facebook