09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
SANXENXO > Quedou nun susto, pero puido ter graves consecuencias. Un treito duns 30 metros do paseo marítimo da Lanzada saíu voando polo aire. Foi ás 11 da noite e cuns refachos de vento que roldaban os 130 km por hora. Con esa intensidade, a estrutura de madeira acabou atravesando a estrada, dando un xiro polo aire de 180 graos. A esa hora da noite non circulaba ningún vehículo pola PO-308, o que evitou que a incidencia rematase con danos maiores. Esta senda peonil de madeira xa sufrira danos no temporal do pasado mes de febreiro. Daquela, o vento provocara unha situación semellante, o que implicou o reforzo de boa parte do paseo. Dase a circunstancia que sobre o tramo danado onte non se actuara, polo que dende o concello pídenlle á Xunta que se faga unha actuación global. A Xunta anunciou xa unha revisión de toda a estrutura para evitar que se repita un episodio como o desta noite. No resto do concello hai que lamentar caídas de árbores e valados de obra á vía pública. Outra das incidencias destacadas no municipio foi a caída de varias planchas dunha estrutura do campo de fútbol situado ó carón do colexio de Noalla. Con todo, o centro puido funcionar hoxe con total normalidade.
Publicado en SALNÉS - CALDAS
RIBADUMIA > Nova edición do simposio MÓSTRATE SALNÉS, unha iniciativa que pretende trasladar ás mulleres que queiran lanzar un proxecto casos concretos doutras mulleres exitosas. A cita está programada para o vindeiro xoves en Ribadumia. O simposio achegará unha serie de experiencias exitosas de empoderamento feminino a aquelas mulleres que estean pendanso en emprender. A través de seis casos concretos, as persoas que participen poderán coñece-las claves para construí-lo seu proxecto cuns cimentos fortes, tentando salvar tamén os atrancos que poden ir aparecendo polo camiño. Segundo explican dende a mancomunidade do Salnés, organizadora do evento, o Simposio serve tamén para tecer lazos entre emprendedoras, creando sinerxías entre proxectos. E todo para que as mulleres atopen noutros casos un apoio que lles permita da-lo paso e aventurarse nunha nova andaina empresarial. Como simposios anteriores, nesta sexta edición terán un protagonismo especial as mulleres da zona. Desta volta serán dúas veciñas de Ribadumia as que conten a súa experiencia, unha coomo creadora de tocados e outra como obradora de botellas de viño, entendidas como pezas de arte. Elas estarán acompañadas doutra emprendedora de Vilagarcía. A xornada complétase coa visita dunha muller de Castelló que creou unha empresa de mandís vintage e tamén dunha xornalista tinerfeña, que afondará na súa actividade especilizada na comunicación gastronómica. Ademais, a xornada contará cunha experiencia internacional: unha manager musical da Arxentina, que explicará a súa faceta laboral por todo o planeta. A cita, o vindeiro xoves, a partir das cinco da tarde no Auditorio de Ribadumia.
Publicado en SALNÉS - CALDAS
VILAGARCÍA > Novembro pecha cunha suba xeralizada do paro. Na provincia de Pontevedra o número de demandantes de emprego incrementouse neste mes nalgo máis de 170 persoas. Ante estes datos, na rúa, a xente agarda que a campaña de Nadal permita recuperar lixeiramente o emprego, nunha campaña marcada pola temporalidade dos contratos. O mes de novembro pecha con datos negativos para o desemprego. Na provincia de Pontevedra o número de persoas que buscan traballo e non o atopan sitúase nos 74.475: son 174 persoas máis que un mes antes, ou o que é o mesmo: un 0,47% máis que no mes de outubro. Visto doutro xeito, os datos coñecidos hoxe son positivos, pero en relación co mes de novembro do ano 2016. Nesta comparativa interanual, o paro descendeu na provincia de Pontevedra algo mais dun 8%. Sexa como for, a ría de Arousa segue a estar entre as zonas máis prexudicadas. Dende o mes de setembro sumáronse ás listas do paro no Barbanza 567 persoas e no Salnés 1.792 parados en só tres meses. Na rúa, este lixeiro ascenso do desemprego con respecto ó mes de outubro non sorprende. A maioría dos enquisados tamén agoiran un incremento da contratación de cara ó Nadal, unha época de moito consumo, caracterizada tamén pola temporalidade dos contratos.
Publicado en SALNÉS - CALDAS
CAMBADOS> Somos Cambados si asistirá á reunión convocada para mañá para revisar o pacto de goberno. Tralo anuncio do edil de Cambados Pode de que non vai participar no encontro, a formación de Somos volveu facer un chamamento ao diálogo. Pediron lealdade ao acordo, e apostan pola continuidade do cuatripartito. Somos Cambados participará mañá na reunión que continuará a revisión do pacto de goberno. A formación volveu facer un chamamento ao diálogo. Se a situación non muda, quen non asistirá será o edil de Cambados Pode. Unha ausencia que non entenden dende Somos que, aseguran, non tomarán ningunha decisión á marxe dos compañeiros de goberno. Segundo José Ramón Abal, a falta de garantías para evitar un uso que considera partidista da portavocía do goberno, que exerce Xurxo Charlín, é un dos principais problemas do funcionamento do cuatripartito. Unha cuestión menor para Somos Cambados. Por iso dende Somos ven nesta nova crise intentos de desestabilizar o goberno cambadés. Cordal tamén fixo un chamamento aos seus socios para que continúen apostando polo goberno de cambio co que se comprometeron no 2015.
Publicado en SALNÉS - CALDAS
CALDAS> Caldas repite homenaxe solidaria a unha das súas veciñas. O concello vén de colaborar coa familia de Yanin Búa para poñer en marcha por segundo ano o seu memorial, que buscan converter nun recordo e nun acto para recadar fondos que permitan loitar contra a enfermidade. De feito, todo o recadado destinarase á Asociación Española Contra o Cancro de Pontevedra. A familia de Yanin Búa mantén a aposta de converter a súa memoria nunha loita contra a enfermidade. Este ano repetirán o memorial que celebraron o ano pasado por primeira vez, converténdoo nunha cita cunha ampla programación para atraer a todos os caldenses. A marcha solidaria pola ruta da Fábrica da Luz será unha das actividades estrela. A inscrición ten un custo de dous euros, e a día de hoxe xa hai máis de 100 persoas inscritas. A organización tamén vende camisetas por seis euros. Todo o recadado destinarase á Asociación Española contra o Cancro de Pontevedra. Na actualidade xa roldan as 400 camisetas vendidas. Agardan que a cita deste ano supere a excelente acollida que xa tivo o memorial do ano pasado, co obxectivo de que a loita da caldense Yanin Búa non caia no esquecemento e axude a outras moitas persoas neste camiño.
Publicado en SALNÉS - CALDAS
SANXENXO> As polémicas obras da avenida Luis Rocafort, en Sanxenxo, enfilan o seu treito final. A Deputación agarda que os traballos de humanización poidan inaugurarse o 22 de decembro, trala instalación das árbores nas beirarrúas e o mobiliario urbano. O 22 de decembro é a data fixada pola Deputación de Pontevedra para a inauguración da avenida Luis Rocafort, en Sanxenxo. Telmo Martín amosábase satisfeito cos resultados da obra, que humanizan unha importante vía de acceso e saída á vila. Ao proxecto inicial, súmase agora o acondicionamento dunha parcela de 200 metros cadrados que xa é titularidade municipal. A actuación permitirá a continuidade da beirarrúas nese treito. Os operarios tamén traballan no remate da pavimentación da avenida e a colocación de árbores e mobiliario urbano, para finalizar unha obra de gran importancia para o goberno provincial. Durante a súa visita, Uxío Benítez e Telmo Martín afastáronse da polémica que rodeou hai uns meses estes traballos. O desencontro remataba coa rotura do tripartito que gobernaba o concello e que encabezaba Gonzalo Pita, que entregaría a alcaldía ao popular Telmo Martín.
Publicado en SALNÉS - CALDAS
CAMBADOS> O BNG fai un chamamento á calma e á responsabilidade para solucionar a crise de goberno en Cambados. En rolda de prensa, os nacionalistas quixeron lanzar unha mensaxe de tranquilidade, insistindo en que eles seguen abertos ao diálogo. O seu voceiro, Víctor Caamaño, pediu a todos os seus socios de goberno que acudan á xuntanza prevista para este venres. Unha cita á que José Ramón Abal, de Cambados Pode, non pretende asistir. Ante a reapertura da crise do cuatripartito cambadés, o BNG aposta polo ton conciliador. Os nacionalistas fan un chamamento á calma e á responsabilidade. Para o voceiro cambadés, a reunión do pasado sábado serviu para avanzar nos aspectos que ata o de agora provocaron os enfrontamentos no seo do cuatripartito. Gran parte dos esforzos diríxense a evitar os solapamentos das áreas, e a conseguir un traballo máis coordinado. En canto á portavocía, José Ramón Abal considera insuficiente o compromiso da alcaldesa de asumir máis peso neste papel que comparte con Somos Cambados. Víctor Caamaño, pola súa banda, confía na palabra dos seus socios. Segundo Víctor Caamaño, a intención é pechar estas cuestións no encontro convocado para este venres. Por iso pediron a todos os seus socios que asistan á cita. Caamaño desbotou a idea de que o pacto de goberno estea roto xa que, apuntou, todos os edís contían a desempeñar as funcións que lles foron atribuídas no documento asinado a principios do mandato.
Publicado en SALNÉS - CALDAS
VILAGARCÍA > Vilagarcía puxo hoxe punto e final ós cursos de Inmersión Dixital. 25 actuacións formativas e 413 alumnos despois, o concello de Vilagarcía clausuraba esta mañá os Cursos de Inclusión e Capacitación dixital. As actividades buscan mellora-las competencias dixitais dos veciños da vila, sexa cal sexa a súa idade ou situación laboral. Os cursos arrancaron no mes de maio e hoxe chegaron ó seu fin por este ano, coa entrega de diplomas ós participantes da derradeira actividade. Durante os últimos días, os alumnos aprenderon a sacar partida á internet á hora de buscar emprego, botando man de novas ferramentas. Outros, fóra xa do mercado laboral, atoparon nestas iniciativas unha vía de acceso ó mundo das novas tecnoloxías. O Concello agarda que para o ano que vén se repita o éxito de participación desta edición.
Publicado en SALNÉS - CALDAS
Martes, 28 Novembro 2017 17:50

Rematan as obras da rúa Castelao do Grove

O GROVE > No Grove, os comerciantes agardan que a reforma da rúa Castelao anime as vendas. Durante esta semana estanse a ultimar os derradeiros retoques do proxecto, que supuxo a peonalización da vía. Os traballos proseguen agora coa reforma do segundo treito da céntrica rúa. A milla de ouro do Grove estrea nova imaxe trala fonda reforma que viviu nos últimos meses. Os espazos para o estacionamento de vehículos foron ocupados por árbores e bancos, convidando ós veciños da vila meca ó paseo. Precisamente, o Concello mantivo hoxe unha xuntanza cos veciños –para explicarlles como deberán acceder ós seus garaxes- e tamén cos comerciantes -para informalos dos novos horarios de carga e descarga e tamén dos espazos que poderán ocupa-las terrazas dos bares. De momento, entre os establecementos da rúa, satisfacción xeralizada, á espera de que a peonalización dea os resultados agardados. A reforma da popular Catorce tamén convence á maioría dos veciños. Outros, pola contra, botan en falta a antiga rúa de Castelao, como arteria circulatoria da vila. Trala primeira fase do proxecto, comezou xa a segunda, entre o cruce con Luis Casais e a subida das Bouzas. Calcúlase que as obras estarán listas antes de que remate o ano.
Publicado en SALNÉS - CALDAS
CAMBADOS> José Ramón Abal deixa o futuro do cuatripartito en mans da militancia de Cambados Pode. A reunión da comisión de seguemento do pasado venres non axudou a desatascar a crise do goberno cambadés, e Abal xa anunciou que non asistirá ao encontro convocado para o día 1. O edil asegura que perdeu a confianza na alcaldesa, e cualifica a situación de tomadura de pelo. Lonxe de calmar os ánimos, o tempo que pasou entre que estalara a crise do cuatripartito o 31 de outubro e a reunión da comisión de seguemento do pacto do pasado venres, só contribuíu a agravar a crise. Segundo José Ramón Abal, o encontro do venres deixou intercambios desagradables entre os catro socios de goberno. Tampouco ve suficiente a proposta de Fátima Abal de asumir máis peso na portavocía do goberno. No pacto segue figurando esta competencia compartida con Somos Cambados, que non renuncia a ela. Ante esta escalada de tensión, a intención de Abal é non acudir ao novo encontro convocado para este venres para seguir revisando o pacto. Ademais, o edil deixa o seu futuro en mans da militancia de Cambados Pode. José Ramón Abal asegura que está disposto a renegociar o pacto de goberno; unha opción que, segundo explica, non aceptaron os seus socios do cuatripartito.
Publicado en SALNÉS - CALDAS
VILAGARCÍA> O Instituto Tecnolóxico para o control do Medio Mariño de Galicia celebrou esta mañá os seus 25 anos de historia. No acto institucional que acolleron as instalacións do peirao de Vilaxoán, as autoridades ensalzaron o papel deste centro, que traballa na súa candidatura para acoller o Laboratorio Comunitario de Referencia para o Control de Bivalvos. Así o defendeu, entre outros, o presidente da Xunta. Numerosas autoridades desfilaron polo Intecmar para celebrar o seu 25 cumpreanos. Neste tempo, o centro de Vilaxoán tense convertido nunha referencia a nivel europeo, como centro punteiro no control do medio mariño. Os asistentes recordaron os comezos do Intecmar, e o seu traballo a prol de garantir a calidade do produto que se obtén do mar galego. Foi un acto cargado de orgullo, que deixou tamén momentos para a emotividade. Trala súa exitosa traxectoria, o Intecmar ten agora un novo reto por diante: materializar a súa candidatura para acoller o Laboratorio Comunitario de Referencia para o Control de Bivalvos. Segundo o presidente da Xunta, o centro de Vilaxoán é idóneo para converterse nesta sé. Con este obxectivo sobre a mesa, Alberto Núñez Feijóo fixo fincapé na necesidade de que o Intecmar se manteña como un dos mellores centros destas características do mundo.
Publicado en SALNÉS - CALDAS
CAMBADOS> Cambados sumouse esta mañá á conmemoración do Día Internacional contra a Violencia Machista. Nun discurso reivindicativo, a alcaldesa Fátima Abal reclamou máis medidas das institucións e unha maior implicación da sociedade para rematar co que cualificou como un auténtico acto de terrorismo. No que vai de 2017, xa foron 50 as mulleres asasinadas polas súas parellas ou exparellas en España. 715 nos últimos dez anos. Así comezaba a alcaldesa de Cambados a lectura dunha listaxe que a estas alturas do 2017 faise case interminable. Ata hoxe, 50 mulleres foron asasinadas en España polas súas parellas ou exparellas. Fátima Abal cualificou a violencia machista de acto de terrorismo. Advertiu o que tamén sinalan os datos, que non é unha cuestión xeracional, e sinalou que a educación como algo fundamental. Abal reclamou máis implicación e mobilización das institucións e da sociedade xeral para rematar cunha lacra social que require da unidade para ser erradicada. Unha mensaxe que tamén se lanzou dende o manifesto que leu a responsable do CIM comarcal. O mesmo documento, acordado no seu da Fegamp, leuse nos outros concellos que forman parte do CIM da Mancomunidade do Salnés, Meis e Ribadumia.
Publicado en SALNÉS - CALDAS
Páxina 1 de 93
HomeBARBANZA - NOIAMostrando artigos por etiqueta: Salnés Top of Page

Síguenos en facebook