• Facebook
  • Twitter
  • Rss
  • Plus
CANAL RÍAS BAIXAS
BARBANZA> O obxectivo da campaña non é outro que tratar de minimizalo impacto desta enfermidade na poboación, especialmente nos grupos de maior risco. A campaña de vacinación antigripal deste ano iniciarase o vindeiro 23 de outubro e prolongarase ata o 29 de decembro. Neste tempo a consellería de Sanidade pretende distribuír unhas 560 mil vacinas entre a poboación, dirixíndose especialmente aqueles grupos de idade de maior risco como poden ser persoas maiores de sesenta anos. Como medida extraordinaria este ano sanidade adquiriu unhas trinta mil vacinas mais, coa previsión de mellorar os resultados da campaña do ano anterior, mantendo a oferta de vacinación a tódalas persoas incluídas nos grupos de risco, de xeito totalmente gratuíto, co fin de aumentar as coberturas. A consellería de Sanidade conta con 900 puntos de vacinación repartidos por toda a comunidade: centros de saúde e hospitais da rede Sergas, centros sanitarios privados, residencias da 3ª idade e outros centros con residentes susceptibles de beneficiarse desta vacinación, como poden ser centros penitenciarios, entre outros.
Martes, 03 Outubro 2017 15:28

Sube o paro en Galicia e tamén en Arousa

AROUSA> O número de parados sitúase en Arousa nas 14.386 persoas, 733 persoas máis que no mes anterior. Setembro volve a deixar cifras negativas en canto á creación de emprego. O número de desempregados volve a medrar en Arousa, segundo os datos do ministerio de Emprego, situándose nas 14.386 persoas, 733 máis que no mes anterior. Uns datos que dende a CIG agardaban, unha vez rematada a tempada estival, e con ela a rescisión de moitos contratos temporais en sectores como o comercio e a hostalería. No Salnés destruíronse durante o pasado mes de setembro 543 empregos, sendo os concellos do Grove e Cambados os que presentan un índice maior de desempregados con 158 e 107 parados máis respectivamente. Outros Concellos desta comarca nos que aumentou tamén o paro foron Meaño con 69, Ribadumia 49 e Vilagarcía 44. Aínda así non son todos datos negativos, houbo municipios coma Catoira, 11, Valga, 9, e Pontecesures, 2, nos que si se creou emprego. En canto ás comarcas do Barbanza e Muros-Noia a situación é moi semellante á do Salnés, aumentando o número de parados o pasado mes de setembro en 190 persoas. Por concellos onde máis se destruíu emprego foi Boiro con 69 desempregados máis, seguido de Pobra do Caramiñal con 47 e Ribeira con 44. O dato positivo obtémolo en Noia onde si se xerou emprego con respecto ó mes anterior, cun total de nove persoas máis que atoparon traballo.
BARBANZA> Cúmprense así os peores dos pronósticos para este primeiro día de traballo nas concesións de Cabío, os Lombos do Ulla e o Bohído. Ó redor duns 1.300 mariscadores das distintas confrarías de toda a Ría dispoñen de autorización para poder traballar nas concesións do libre marisqueo en Arousa. Aínda así non todos optaron por facelo neste inicio de campaña. As previsións xeradas, despois das mostraxes realizadas nas últimas semanas non eran demasiado satisfactorias. Máis ben todo o contrario, augurando pouco marisco. E a tenor do vivido nesta primeira xornada non se enganaron, xa que a maioría dos mariscadores tiveron serias dificultades para acadar os topes establecidos, como acontecía en Cabío. A triste realidade de Cabío, non dista en moito da que se viviu tamén nas outras concesións do libre en Arousa como poden ser o Bohído ou os Lombos do Ulla. Dende a maioría dos pósitos arousáns incídese novamente na necesidade de acometer dunha vez por todas un cambio no modelo produtivo do libre marisqueo. Un exemplo desta reclamación témola no patrón maior pobrense. Segundo el, o actual modelo de xestión é un auténtico fracaso. Polo de agora aínda é cedo para valorar o que será a campaña deste ano, e haberá que agardar ás próximas semanas para ver o que dan de si as concesións no libre. No mellor dos casos, e sempre e cando a presenza do marisco o permita, a campaña debería prolongarse ata marzo. Algo que, visto o visto, parece pouco probable.
BARBANZA> A Plataforma en Defensa da Sanidade Pública do Barbanza vén de iniciar que se cubra a praza de psicólogo a tempo completo, xa que na actualidades só presta servizo dous ou tres días a semana. A través dunha campaña de recollida de sinaturas, a Plataforma en Defensa da Sanidade Pública do Barbanza, reclama unha mellora da calidade na atención á saúde mental que se presta na sanidade pública na comarca. Dende a Plataforma denunciaron que na actualidade o especialista que exerce a súa función no hospital está compartido con outro centro hospitalario, e só pasa consulta dous ou tres días á semana, co agravante de que cada seis meses cambia ademais de facultativo. Ante esta situación a Plafaforma decidiu iniciar unha campaña de recollida de sinaturas entre a veciñanza. Esta fin de semana membros da entidade estiveron xa recadando firmas no mercadiño de Ribeira. A próxima cita será o próximo sábado en Porto do Son, o día 11 estarán na Pobra do Caramiñal e o 17 en Boiro.
POBRA> O alto tribunal considera improcedente o seu despedimento, instando ó Concello ó pago duns 53 mil euros. O concello da Pobra do Caramiñal está obrigado ó pago dunha indemnización duns 53 mil euros ó exaparellador municipal, Manuel Sabín, por despido improcedente. A sentenza, ditada polo TSXG, indica ademais que o Concello deberá facer fronte tamén ás costas do proceso e o pago da seguridade social do extraballador municipal, que estivo desempeñando as súas funcións dende o ano 1999 ata abril de 2016, momento no que foi despedido polo actual goberno de Nós Pobra. En primeira instancia, o Xulgado do Social de Santiago xa lle dera a razón ó exaparellador, condenando ó Concello a indemnizalo ou readmitilo. Non se deron ningunha destas dúas opcións, e Manuel Sabín recorreu ó Tribunal Superior que agora volve a darlle a razón. Da nova tamén se fixo eco o Partido Popular. O seu portavoz, Manuel Durán, criticou as formas do equipo de goberno neste proceso, ó que agora co pago desta importante indemnización deberán facer fronte os veciños. A sentenza é firme e sobre ela non cabe xa recurso.
BOIRO> A actuación, cun orzamento superior ós 200 mil euros, será realizada con cargo ó remanente de tesourería do pasado exercicio 2016. Tratábase dun dos compromisos que o Partido Popular levaba no seu programa electoral para a presente lexislatura, e que segundo o alcalde, Xoán Xosé Dieste, será realizado a metade de mandato. Con estas afirmacións, o rexedor boirense dá réplica ás críticas formuladas nos últimos meses polos grupos da oposición que viñan demandando a realización desta obra. A actuación, cun presuposto próximo ós 200 mil euros, virá a solucionar os problemas de abastecemento de auga a varias zonas da parroquia de Bealo, especialmente na tempada estival.
MUROS> A empresa comprometeuse a manter os cen postos de traballo actuais desta planta. Coa finalidade de concentrar toda a súa actividade en Carballo, onde se sitúa o seu centro principal de operacións, o grupo conserveiro Calvo, vén de anunciar o peche da súa planta de Esteiro. A conserveira xustificou a súa decisión na perda de competitividade e capacidade que sufriran estas instalacións nos últimos anos. Na actualidade na planta de Esteiro, desenvolvíanse case de forma exclusiva a limpeza de pescado para a súa posterior elaboración en Carballo, unha vez que o grupo decidira eliminar hai varios anos do seu catálogo varios productos cuxa producción se realizaba de xeito case exclusivo nestas instalacións. A pesar de que a nova xa se viña contemplando dende hai tempo, e a propia dirección da firma xa viña negociando as condicións co comité de empresa, o anunciou causou unha gran preocupación na zona, xa que directa ou indirectamente da súa actividade dependen numerosas familias. aínda Así, a empresa comprometeuse a manter os aproximadamente cen postos de traballo actuais, sumando fixos e eventuais, ofrecéndolle a posibilidade os seus operarios a poder continuar coa súa actividade na capital da comarca de Bergantiños, así como axudas para os desprazamentos. O que está por ver e se moitos deles acabarán por aceptar a proposta, xa que por cuestións persoais ou familiares a verían como inasumible, a máis de sesenta quilómetros de distancia e a máis dunha hora de percorrido.
RIBEIRA> Organizada pola Escola de Boxeo El Canario disputarase unha nova edición da Velada de Boxeo 'Cidade de Ribeira'. O polideportivo da Fieiteira será escenario este sábado dunha nova edición da velada de boxeo ‘Cidade de Riveira’. A cita, organizada pola Escola de Boxeo El Canario en colaboración co propio Concello, incluirá varios combates de distintas categorías, varios deles valedeiros para o Campionato Galego como é o Campionato Feminino de Elite. Dende o Concello destacaron a importancia deste evento, ó tempo que recoñeceron o labor que realiza a Escola de Boxeo El Canario, principal organizador do evento. Dende a organización da velada fan un chamamento ós veciños a acudir este sábado á Fieiteira. Os combates iniciaranse a partir das dez da noite e o prezo das entradas será de dez euros para a grada e 12 en cadeira, podéndose adquirir xa de forma anticipada en varios establecementos de Ribeira a un prezo inferior, oito en grada e dez en cadeira.
POBRA> Os populares consideran fóra de lugar e atemporal a idea do equipo de goberno de sacar adiante os presupostos a estas alturas do ano. Para o PP este é un exemplo máis da deriva á que o goberno municipal de Nós Pobra está a levar ó municipio. A idea do executivo de sacar adiante o documento orzamentario a estas alturas do ano, con apenas tres meses para rematar o presente exercicio, parécelles inviable. Na proposta de orzamento que o goberno lle entregou á oposición, o PP bota en falla partidas destinadas ó desenvolvemento empresarial e comercial, para eles vitais para o relanzamento do Concello. Tamén botan en falla moitas das actuacións que resultaron aprobadas este ano en pleno e que non foron incluidas. Da actual situación de estancamento na que segundo eles está sumido o municipio non só responsabilizan ó equipo de goberno de Nós Pobra, dende o PP sinalan ó BNG e Partido Socialista, por permitirlle cos seus apoios, seguir gobernando.
BARBANZA> Segundo o presidente do organismo provincial, Valentín González Formoso, trátase do maior orzamento contemplado na historia da institución. Foi o propio presidente da Deputación coruñesa, Valentín González Formoso, acompañado do deputado responsable da área de Plans e Cooperación cos Concellos, Xosé Regueira, o encargado de explicar as principais novidades do Plan Único, para as anualidades 2017-2018. En total investiranse uns 166 millóns de euros. Segundo o presidente do organismo provincial trátase dun investimento histórico, o maior orzamento contemplado nun plan na historia da Deputación. Un aspecto este que tamén foi destacado polo Para o deputado responsable da área de Plans e Cooperación cos Concellos, Xosé Regueira. Segundo el o Plan Único é un instrumento pioneiro para artellar as relacións da Deputación e os concellos. Dese total de 166 millóns de euros, máis de trece millóns de euros corresponderanlle ós concellos das comarcas do Barbanza e Muros-Noia.
Rianxo> Dende a formación denunciaron a situación actual do Concello, que a día de hoxe, segue sen contar con orzamentos. A piques do remate do ano, e xa coa idea de que se traballará co orzamento de 2016 prorrogado, Rianxo en Común critica o escaso interese por parte do equipo de goberno en levar adiante o presuposto, e con el o seu proxecto político. Dende a súa chegada á corporación Rianxo en Común vénlle solicitando ó equipo de goberno un maior esforzo á hora de realizar uns orzamentos máis claros e participativos, nos que os veciños e as asociacións poidan facer achegas, investindo os cartos en iniciativas que posibiliten a mellora da situación actual do municipio. Algo que actualmente non está a acontecer. Rianxo en Común vai máis alá ó sinalar que de renunciar á acción política, limitándose unicamente á xestión, sería tamén discutible a dedicación exclusiva e as dúas parciais das que dispón actualmente o goberno. Aínda así confían en que a reverta situación, e para o 2018 o goberno presente uns orzamentos en tempo e forma.
RIANXO> Onte domingo a Plataforma celebrou unha nova concentración ás portas da casa consistorial para seguir reclamándolle á Xunta a posta en marcha deste servizo. Con menor presenza de xente do habitual debido á chuvia, os membros da Plataforma volveron saír á rúa para reclamarlle á Xunta a construción do centro de día na localidade. Nesta ocasión, por causas da adversa meteoroloxía, si decidiron abortar o habitual percorrido polas rúas da vila..todo se quedou esta vez nunha simple concentración, na que se puideron escoitar berros en contra da Xunta, e se insistiu na necesidade de dotar ó municipio deste servizo.. Van alá xa 76 días de peche no Concello. E os ánimos a pesar do longo tempo transcorrido dende o primeiro día do encerro non minguaron...é máis, parece que continúan intactos coma o primeiro día..dende a propia Plataforma aseguraron que continuarán no seu empeño ata obter unha resposta positiva á súa reivindicación, algo que consideran xusta.
HomeMostrando artigos por etiqueta: Barbanza Top of Page

Síguenos en facebook