• Facebook
  • Twitter
  • Rss
  • Plus
CANAL RÍAS BAIXAS
POBRA> A Pobra acolle este sábado a decimo segunda edición da Bandeira de Traíñas Concello da Pobra. O equipo anfitrión, segundo na clasificación xeral, parte con moitas posibilidades de facerse co triunfo.
POBRA> A primeira das probas será xa este mes de agosto, o domingo 27, coa disputa da novena edición da Carreira Popular Concello da Pobra do Caramiñal. Por segundo ano consecutivo a Mancomunidade de Municipios Arousa Norte volverá a ofertar dentro do seu calendario deportivo unha nova edición do ‘Circuíto Catro Carreiras e Unha Meta’. A cita incluirá unha proba en cada un dos concellos que integran Arousa Norte. Segundo o actual presidente da entidade, o alcalde de Rianxo, Adolfo Muíños, a iniciativa trata de fomentar a práctica da actividade física e deportiva ó tempo que potencia os escenarios naturais e paisaxísticos desta zona. As bases do circuito xa están a disposición de tódolos interesados na propia web de Arousa Norte. Poderán participar todas aquelas persoas que o desexen. A primeira das probas a disputar será o próximo 27 de agosto coa celebración da Carreira Popular Concello da Pobra do Caramiñal. A esta seguiranlle o 30 de setembro a Carreira Popular de Santa Uxía, o 1 de novembro a Carreira Popular Concello de Rianxo e para rematar o 3 de decembro coa Carreira Popular Concello de Boiro.
RIBEIRA> Gran actuación de Ana Peleteiro nos Mundiais de Londres. A ribeirense acabou onte sétima na final de triple salto, cun rexistro de 14’23, a súa mellor marca persoal. Aínda así un golpe recibido no seu cuarto intento, impedíronlle estar na loita polas medallas, véndose obrigada a retirarse. Un golpe que en principio non reviste gravidade polo que poderá volver a competir en breve. A medalla de ouro na proba foi para a venezolana Yulimar Rojas cun salto 14,91, atleta coa que a ribeirense comparte adestrador, o cubano Iván Pedroso. A prata para a colombiana Caterine Ibargüen con 14,89 e o bronce para a kazaja Olga Rypakova que saltou 14,77.
RIBEIRA>s. Durante toda a xornada viviuse unha actividade frenética. A primeira subhasta, a do marisco, realizouse ás tres da tarde, mentres que a poxa do resto de capturas tivo lugar ás seis. A nova lonxa de Ribeira facía hoxe a súa posta de longo oficial coa apertura das instalacións. Foi un día de actividade frenética. Moitas das vendedurías que dende hoxe xa operan nas novas instalacións, realizaban esta mañá o traslado das súas pertenzas á súa nova ubicación. Traballo arreo tamén para os traballadores da empresa que a partir de agora levará a xestión da nova rula, e que substituirá ó Concello nese labor, así como tamén para os compradores, na súa maioría satisfeitos co cambio ás novas instalacións. A última hora da mañá foron chegando a maioría dos barcos, primeiro as embarcacións menores, que traballan no marisqueo, e posteriormente artes menores, arrastre e cerco. En cifras destacar os 30 mil quilos de lirio descargados, sendo a especie máis abundante. Seguida do xurelo e a xarda, que sumaron entre as dúas especies uns 29 mil quilos. O polbo foi a cuarta especie en canto a volume de descargas, cun prezo que rondou entre os tres euros e medio o máis barato e os 11´20 o máis caro. En canto ó marisqueo, na rula subhastáronse 321 quilos de ameixa rubia a un prezo medio de 8’18, 227 quilos de xapónica a 7’97 e 616 de navalla, que se pagaron a unha media de 6’86. Despois de máis de 25 anos de actividade, a vella lonxa pechou as súas portas definitivamente. Fíxoo despois dun ano no que se acadaron cifras históricas, con case 32 millóns de quilos de pescado e unha facturación de récord, que superou os 43 millóns de euros. queda pendente a partir de agora a que se destinarán esas vellas instalacións. Aínda que todo apunta a que poderían albergar a nova nave dos redeiros.
RIANXO> Satisfacción no executivo rianxeiro pola consecución dos fondos europeos Leader, que xestiona Deloa, para a realización dunha nova intervención arqueolóxica neste emblemático espazo. Uns douscentos mil euros. Esa será a cantidade destinada a este proxecto de intervención arqueolóxica que se desenvolverá en dúas anualidades e que prevé a posta en valor do Castelo da Lúa. A actuación irá con cargo case integramente ós fondos europeos que xestiona a Asociación de Desenvolvemento Local Deloa. A primeira fase do proxecto desenvolverase xa este ano. Cabe lembrar que última actuación importante realizada neste espazo data xa do 2007.
BOIRO> O rexedor boirense gabou o labor realizado polos traballadores municipais durante as pasadas festas. As críticas vertidas dende o BNG referidas á falla de limpeza das rúas e o deficiente servizo de recollida de lixo, especialmente durante as pasadas festas do verán, non foron ben recibidas no executivo, ó considerar que non se axustaban á realidade. Tanto o alcalde, Xoán Xosé Dieste, coma o coordinador de Servizos, Nacho Pérez, negaron tales críticas, afirmando que si se realizou un bo traballo, reforzando e mesmo incrementado considerablemente o servizo prestado. Dende o Concello apuntouse a que se trata dunhas críticas inxustas e desafortunadas por parte do BNG, que provocaron un gran malestar nos propios traballadores municipais. O alcalde aproveitou tamén a ocasión para agradecer precisamente o traballo que realizan os operarios municipais. Un traballo que en numerosas ocasións non é recoñecido.
RIBEIRA> A música foi sen dúbida a gran protagonista dos festexos, que un ano máis reuniron a numerosas persoas. A programación das festas desenvolvida durante toda a fin de semana tratou de satisfacer os gustos de pequenos e maiores. Foron numerosas as actividades desenvolvidas, aínda que as que levantaron maior expectación foron sen dúbida as actuacións musicais. Unha delas foi a actuación de Merche na praza de España... Ademais de Merche, outros artistas e grupos de éxito achegáronse este ano á localidade para desfrute de moitos. Foi o caso de Treixadura, que onte domingo encargouse de poñer o broche final ós festexos... Como é tradición na tarde do sábado, a lonxa volveu a reunir a numerosos visitantes, que asistiron á celebración da misa na honra da Virxe do Carme. Trala misa, os fieis acompañaron á patroa do mar na tradicional procesión. Na tarde de onte tivo lugar a coroación das raíñas da flor que congregou a numerosos visitantes no adro da igrexa. Acto seguido, as raíñas e mailas súas damas percorreron as rúas da cidade nas súas carrozas. Xa pola noite, as festas dixeron o seu adeus ata o ano que vén coa tradicional tirada de fogos artificiais dende o peirao da localidade.
RIANXO> A proba, organizada pola peña ciclisturista Castro Barbudo, terá lugar este próximo domingo a partir das nove da mañá e será puntuable para o Open Galego na especialidade de maratón. Os afeccionados ó ciclismo terán unha cita este próximo domingo en Rianxo coa disputa da décimo oitava edición da Subida ó Castro Barbudo de BTT. Todo un clásico neste tipo de probas na comarca do barbanza. Organizada pola peña ciclisturista Castro Barbudo a cita terá este ano un aliciente máis, ó estar incluída no Open galego na especialidade de maratón. Dende o Concello, que colabora na organización desta cita, valoraron moi positivamente a proba A saída está prevista para as nove da mañá dende a Praza de Campo de Pazos en Taragoña. Na carreira prevese a participación duns 150 corredores sumando tódalas categorías que deberán dar dúas voltas ó circuíto, no caso da especialidade de maratón, duns 31 quilómetros de percorrido.
BOIRO> Para os nacionalistas o envellecemento da poboación fai cada vez máis necesario este servizo. Dende o BNG sinalan que cando tiñan responsabilidades de goberno remataron o actual centro de día, dando ademais os primeiros pasos para a consecución da residencia para a localidade. Pasos que coa entrada do Partido Popular na Alcaldia paralizáronse.
RIANXO> Aínda que non arrancaron un si á súa demanda dun centro de día para a localidade, si conseguiron un compromiso de que se habilitaría este servizo se existe unha ampla demanda. Nin si nin non. Dende a plataforma veciñal valoraron de xeito tibio a reunión mantida hai uns días coa xerencia do Consorcio Galego de Benestar, e na que tamén tomou parte o delegado territorial da Xunta na provincia da Coruña, Ovidio Rodeiro. Aínda que non obtiveron unha resposta afirmativa á súa demanda de construir un centro de día na localidade, si conseguiron arrancar un compromiso de levalo a cabo se existe uha demanda de alomenos 150 persoas cun grao de discapacidade de nivel dous ou tres, avalado iso si por un certificado médico. Ante esta situación, a plataforma acordou continuar co peche no salón de plenos do Concello. Unha protesta que manteñen dende hai unhas tres semanas, á que se uniran novas accións nos próximos días. O contido desa xuntanza tampouco deixou satisfeito ó executivo rianxeiro. Segundo o alcalde, Adolfo Muíños a resposta dada pola Xunta non ofrece unha saída factible nin a curto nin a medio prazo.
BOIRO> Dieste negou que se producira unha tala de árbores indiscriminada e segundo el a actuación porá fin a numerosos focos de vertidos urbanos. Sen querer entrar en polémicas, o alcalde aludiu á enorme importancia desta actuación amplamente demandada, cun presuposto que supera os dous millóns de euros. Segundo el, con ela ponse fin a un problema de numerosos focos de vertidos urbanos que van parar ó mar, corrixindo eivas existentes na rede xeral realizadas por goberno anteriores. Por esta razón non entende a polémica que está a suscitar a obra, principalmente por parte dalgúns grupos da oposición, ó considerar que se trataba dun atentado ecolóxico, coa tala indiscriminada de árbores autóctonas que se atopan neste bosque de ribeira. O alcalde referiuse tamén ó que significará no futuro este proxecto que leva aparellado a construción dun espazo verde, que incluirá unha pasarela de madeira, un pequeno merendeiro e unha senda peonil ata a praia de Barraña. A actuación súmase as numerosas obras realizadas nos últimos anos en materia de saneamento achegados tanto con fondos propios coma procedentes doutras Administracións, cun investimento próximo ós dez millóns de euros, de cara a renovar a obsoleta rede xeral.
RIANXO> A proba, que terá lugar o sábado 12 de agosto, volverá a ter un carácter solidario, xa que todo o recadado irá destinado a asociación de persoas con diversidade funcional Ambar. Por segundo ano consecutivo Rianxo celebrará a Carreira-Andaina Nocturna Solidaria ‘Castelo da Lúa’. Será o próximo sábado 12 de agosto, a partir das nove e media da noite, con saída dende a propia praza do Concello. A actividade está organizada pola Sociedade Barbantia Roda en colaboración co Club Atletismo Rianxo e o propio Concello. Tanto a carreira coma a andaina terán un carácter popular, con perfís e distancias accesibles a calquera tipo de persoas. O que se pretende dende a organización é acadar unha alta participación na proba e que sexa un gran festa do deporte. A proba volverá ater un carácter solidario. Todo o recadado irá a parar á asociación de persoas con diversidade funcional Ambar. Un xesto que agradecen dende a entidade. Dende o Concello fan unha chamada á participación, pois a ocasión ben o merece. Ademais da propia participación na carreira ou na andaina, tamén se pode colaborar coa iniciativa a través do Dorsal 0, facendo unha doazón polo importe desexado. As inscrición poden realizarse en liña ata o vindeiro xoves 10 de agosto na páxina web de EME Sports ou de xeito presencial na Praza Castelao ata 15 minutos antes do inicio da proba.
HomeMostrando artigos por etiqueta: Barbanza Top of Page

Síguenos en facebook