09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
CANAL RÍAS BAIXAS  :: Información local
Mércores, 25 Outubro 2017 18:27

Rianxo aposta polas praias accesibles

RIANXO> A praia de Tanxil, en Rianxo, conta con tódalas garantías de accesibilidade despois da intervención que vén de realizar o concello grazas a unha axuda da Axencia Galega de Turismo. A instalación de dúas sendas peonís permite o tránsito entre Tanxil e Quenxo que contaránn ademais con baños adaptados de forma permanente.
POBRA> Entre as propostas aprobadas pola corporación municipal nos últimos anos e que aínda non se puxeron en marcha figura un plan de traballo de prevención entre a mocidade. Como vén sendo habitual ó achegarse a conmemoración do 25 de novembro, día en contra da violencia contra as mulleres, o BNG levará ó vindeiro pleno unha iniciativa solicitando que se executen determinadas propostas que nos últimos anos foron aprobadas pola corporación municipal nesta materia, e que, a día de hoxe, aínda non se puxeron en marcha. Entre os acordos figura a necesidade de levar a cabo un plan que recolla as necesidades reais en canto a recursos materiais e humanos relacionados cos casos de violencia de xénero, así como desenvolver tamén traballo de prevención entre a mocidade, en colaboración cos centros educativos do municipio.
POBRA> Para os nacionalistas existen numerosos puntos de perigo ó longo desta rúa nos que cómpre actuar. Unha das zonas de maior perigo dáse no cruce entre a rúa Lamas e Andrés con Rafael Dieste, onde a visibilidade é escasa, e os vehículos vense obrigados a invadir carrís de circulación para poder acceder á estrada. Outra das zonas de perigo sitúase na rúa Lápido, ó seu paso a carón do parque Rafael Baixelas, que carece de beirarrúas polo que os peóns que habitualmente transitan por ela vense obrigados a ocupar a zona habilitada para os vehículos. Outro dos problemas de seguridade prodúcese na saída á Rúa Gasset, onde os vehículos teñen que facer o stop en riba dun paso de peóns.
RIBEIRA> Este mediodía inaugurábase no hall da casa consistorial unha exposición de pintura da artista local Maralla. Organizada en colaboración coa tenda-galería O Faiado, a mostra de Maralla, que pode visitarse na zona do hall e nas escalinatas da casa consistorial, comprende un total de 23 obras realizadas nos catro últimos anos pola artista nada en Corrubedo. A exposición inaugurada este mediodía contou, ademais da autora, con varios membros da corporación municipal, entre os que se atopaba o propio alcalde, Manuel Ruíz. Segundo el, a mostra forma parte dunha iniciativa impulsada polo Concello dende hai varios meses de cara a promocionar a arte e a cultura entre todos aqueles veciños que se acheguen a realizar calquera xestión á casa consistorial. A autora agradeceu a posibilidade de poder ofrecer as súas obras neste espazo a tódolos veciños do municipio. Segundo ela a maioría dos cadros teñen unha temática mariñeira, representando elementos tan característicos da parroquia de Corrubedo como é o caso do seu porto ou o faro. A exposición poderá ser visitada ata o próximo 30 de novembro.
BARBANZA/NOIA> Os populares valoran moi positivamente os orzamentos da Xunta para o vindeiro ano 2018 cun investimento previsto para a comarca que supera os doce millóns de euros. Máis de doce millóns de euros. Esta cantidade é a que a Xunta de Galicia prevé investir na comarca do Barbanza para o ano que vén. Uns datos que dende o Partido Popular consideran moi positivos. O deputado, Carlos López Crespo, referiuse a algunhas das partidas máis importantes. Así destacou os case 4,5 millóns de euros para a construción da EDAR de Rianxo, os 1,7 millóns de euros para a mellora dos pantaláns dos bateiros de Cabo de Cruz ou os 1,4 millóns para o desenvolvemento do borde portuario en Porto do Son. Tamén se prevén outras actuacións como son diversas melloras no saneamento de Lousame, uns 200 mil euros, o proxecto para a ordenación viaria de acceso ó porto de Ribeira, 475 mil ou a reforma integral da praza de abastos de Noia, 150 mil. Aínda así nesta última comarca, a maior parte do investimento será destinada ó desdobramento da autovía, que contará cunha partida neste 2018 de 250 mil euros para o inicio da redacción do proxecto, e para o que as contas autonómicas recollen un investimento total de 15 millóns de euros ata o ano 2021. Dende as filas populares destacouse ademais que as contas presentadas polo Goberno Galego prevén tamén un incremento notable en catro eixes fundamentais como son os servizos sociais, a sanidade, a educación e a creación de emprego.
Venres, 20 Outubro 2017 17:28

Peor que o ano pasado

RIANXO> Van alá algo máis de dúas semanas dende o arranque da actividade no libre marisqueo e apenas hai xa recurso nos Lombos do Ulla. Aínda que nun primeiro momento os informes dos propios biólogos da consellería do Mar falaban da presenza de berberecho nos Lombos do Ulla, a situación real é ben diferente, e as escasas capturas están a condicionar este inicio da campaña. Apenas hai berberecho e os profesionais tiran da ameixa xapónica para poder levantar un xornal digno. O peche das concesións marisqueiras en Noia por mor da toxina está a ser unha boa nova para os profesionais rianxeiros, que ben unha lixeira suba na cotización do bivalvo en lonxa. Pero é algo, por desgraza para eles, puntual... Segundo explicou o propio patrón maior, a escasa produtividade nos Lombos do Ulla, vén provocada pola gran cantidade de embarcacións que vén soportando dende hai anos o que dificulta a recuperación das especies.
BARBANZA> Ademais das concentracións prepáranse varias xornadas de folga en tódolos servizos do Sergas para os días 2 e 3 de novembro. Esta mañá, ás portas do hospital, persoal do centro hospitalario do Barbanza, atendendo a unha convocatoria da plataforma sindical da Sanidade , conformada pola CIG, CC.OO, UXT, CSIF, SAE e Satse, concentrouse para reclamar un calendario de reunións na que negociar a recuperación progresiva de dereitos perdidos nestes últimos anos polos traballadores. A de hoxe era a primeira das dúas concentracións convocadas. A próxima terá lugar o vindeiro mércores 25. Ademais esta mañá informouse tamén da convocatoria de folga en tódolos servizos do Sergas para os próximos días 2 e 3 de novembro ante a negativa da Xunta a implementar a recuperación dos dereitos dos profesionais da sanidade. Os propios traballadores do hospital barbanzán aseguraron que a Xunta está a incumprir os acordos asinados a este respecto, demandando que nos presupostos de 2018 se inclúa unha partida específica para isto.
RIBEIRA> A Policía Nacional investiga as posibles causas do lume que se orixinaba esta pasada madrugada e que deixaba cuantiosos danos. Ó redor das tres e vinte desta pasada madrugada producíase un aviso ó servizo de Emerxencias do 112 por un posible incendio na nave de Max China en Xarás. Ata o lugar desprazáronse efectivos dos parques de bombeiros de Ribeira e Boiro, que iniciaron os labores de extinción das lapas. Esta mañá unha dotación de retén dos bombeiros cun vehículo nodriza continuaba na zona, realizando labores de control e refrixerado, para que o lume non volvera a reactivarse. Ata a zona tamén se achegaron membros da policía científica da Policía Nacional, que se encarga da investigación, co fin de esclarecer as posibles causas do incendio. As primeiras hipóteses apuntan a que puidera ser intencionado.
BOIRO> O alcalde, Xoán Xosé Dieste, confirmou a existencia dunha partida reservada de 1’7 millóns de euros nos presupostos autonómicos do ano que vén para iniciar xa a súa construción. Sen dúbida tratábase dunha das maiores demandas dos diferentes gobernos municipais que durante estes anos pasaron pola alcaldía boirense, que por unha ou outra razón nunca chegaba a executarse. Segundo o alcalde, Xoán Xosé Dieste, a actuación verase finalmente cumprida o ano que vén grazas á aportación do Goberno Autonómico. Nos presupostos de 2018 inclúese unha partida inicial de 1,7 de millóns dos preto de sete nos que está presupostado o proxecto. Dieste destacou a importancia desta obra, dado o peso do sector bateeiro na localidade, e a importancia das mesmas de cara á reordenación dos espazos portuarios. A actuación sumarase a outras importantes melloras xa realizadas, ou que están a piques de rematar, como é o caso da instalación dos pantaláns para as embarcacións marisqueiras no que se investiron uns setecentos mil euros ou obras de conservación e mantemento na explanada portuaria por valor de máis de 40 mil euros.
RIBEIRA> Para os nacionalistas a actitude do goberno local non está a ser a apropiada, acusándoo de actuar con pasividade ante esta problemática. Atendendo a unha denuncia dos propios veciños da zona, o BNG vén de facerse eco dun novo vertido de augas residuais no río Listres, nos Areeiros. Segundo os nacionalistas o foco do problema parece ser, unha vez máis, o aliviadoiro do tanque de tormenta existente no lugar. O BNG criticou a pasividade do Concello con este problema e as escasas solucións que se lles están a dar ós veciños afectados. A través dun escrito presentado no Concello, o BNG pídelle ó goberno local que solicite a Augas de Galicia o informe realizado sobre esta vertedura e se ten pensado esixir algunha responsabilidade a quen corresponda por este suceso.
BOIRO> O incendio afectou a varias zonas da parroquia de Cures. Durante a tarde-noite chegou a activarse a situación dous debido á proximidade das lapas ás vivendas. Un dos primeiros focos producíase na zona da Figueira. Ó mediodía, a columna de fume e lapas, avanzaba a velocidade de vertixe pola serra do Barbanza, axudada polas altas temperaturas e a forza do aire. Os medios terrestres apenas podían facer nada nesa zona de difícil acceso, e os aéreos, tampouco, debido ás condicións de vento existente. Ás nove da noite a situación empeorou. Nese tempo e segundo as primeiras estimacións de Medio Rural levaban ardidas xa máis de noventa hectáreas. Xa era, sen dúbida, o maior incendio dos que se levan rexistrado na comarca no que vai de ano. O lume estaba totalmente incontrolado e a situación facíase, cada vez, máis complicada xa que as lapas aproximábanse a varios núcleos de vivendas como é o caso de Balteiro e Lidón. Foi nese momento, entrada xa a noite cando se decretou o nivel de alerta dous debido á proximidade do lume a casa. Para os veciños deste último núcleo boirense foron momentos de gran tensión e medo, xa que as lapas avanzaban cara as súas casas. A pesar do medo vivido, non houbo que lamentar danos persoais, e tampouco tiveron que desaloxar as súas vivendas, grazas ó traballo dos equipos de emerxencias, que pasaron toda a noite na zona. O incendio de Cures non foi o único que se rexistraba esta pasada fin de semana no Barbanza. En Ribeira producíanse tamén varios lumes, aínda que a menor escala, que afectaron á zona de salmón, en Oleiros, e tamén a Palmeira, obrigando a mobilizar a estas dúas zonas a varios equipos de extinción.
Luns, 16 Outubro 2017 19:35

O Arousa lévase ó derbi ante o Boiro

BOIRO> Os vilagarciáns impúñanse ó Boiro en Barraña por cero goles a dous. Os tantos dos de Jorge Otero foron obra de Yerai e Javi Pazos. Cunha ampla presenza de afeccionados nas bancadas do municipal de Barraña, onte domingo disputouse o derbi comarcal entre o Boiro e o Arousa, que rematou co resultado final de cero a dous. Aínda así, e a pesar da diferenza no marcador, resultou un partido vibrante, no que os boirenses non foron inferiores ó seu rival. No inicio os de Jorge Otero sairon máis enchufados ó partido, levando o dominio no xogo. Foi nestes primeiros minutos de xogo cando se producía ademais a nota tráxica, coa lesión de Taboada, despois de recibir un testarazo de Sidibé na disputa dun balón aéreo. O xogador boirense tivo que abandonar o partido e foi trasladado a un centro hospitalario onde en observacións pasou a noite, aínda que á mañá xa foi dado de alta. O lance obrigou a suspender o choque uns minutos. O parón favoreceu ó Boiro que a partir de aí iniciou o seu dominio. A pouco para o remate da primeira parte producíase tamén unha das xogadas claves, que puido cambiar o signo do partido. O brasileiro Igor caía dentro da área tras un choque, aínda que o colexiado non interpretou nada. A xogada foi moi protestada polos locais e tamén na bancada. Eran os mellores momentos do Boiro. Co resultado de cero a cero chegaríase ó descanso. Xa na segunda parte máis do mesmo. Os dous equipos intentaban facerse co dominio do xogo pero sen apenas perigo na área rival. A falta de quince minutos para o final do partido, o Arousa conseguiría adiantarse. Unha xogada por banda de Suso, Javi Pazos e Yerai, acabou co balón nos pés deste último que de tiro cruzado enviaba o balón ó fondo das mallas. Era o cero a un. O tanto deixou noqueado ó Boiro que tres minutos máis tarde vería de novo perforada a súa portería. Esta vez Javi Pazos, que recibía só no segundo pau, enviaba o balón a dentro da portería. Sen tempo para a recuperación, o Boiro vía como se lle escapaba o partido. Os tres puntos sitúan ó Arousa na novena praza con catorce puntos, os mesmos que ten o Boiro, que agora se ve superado polos vilagarciáns na clasificación. Na próxima xornada, o Arousa recibirá na Lomba ó Barbadás, mentres que o Boiro enfrontarase ó Alondras.
HomeMostrando artigos por etiqueta: Barbanza Top of Page

Síguenos en facebook