• Facebook
  • Twitter
  • Rss
  • Plus
CANAL RÍAS BAIXAS
MUROS> A voceira do Grupo municipal do Partido Popular, Inés Monteagudo, denunciou hoxe o estado de abandono e deterioro no que se atopan as instalacións do cemiterio municipal da Atalaia. A través dunha moción que levará á vindeira sesión plenaria a 'popular' reclama ó goberno local a realización dun proxecto de acondicionamento en condición, e se habilite unha partida orzamentaria para manter o recinto. Monteagudo sinala que a súa denuncia recolle o profundo malestar da veciñanza polo mal estado do acceso principal, a zona central e as ramplas de subida, así como polas gretas, as manchas nas paredes e a inexistencia de axardinamento no recinto.
MUROS> O concello de Muros anima á cidadanía a facer uso do servizo municipal de recollida de enseres. Chamando previamente a empresa responsable indica a data para o depósito do residuos evitando que permanezan na rúa.
NMUROS> O concello de Muros acolle este domingo unha carreira solidaria en favor de Cáritas. Dende a organización, que corre a cargo da piscina municipal, agardan superar os cincocentos participantes da pasada edición.
MUROS> O concello de Muros porá a disposición da xustiza a información relativa a unha factura municipal na que observan unha serie de irregularidades. Denuncian que se emitiu polo cambio das rodas do camión do Grupo de Emerxencias; substitución que non chegou a realizarse.
MUROS> A nova gardería de Muros estará operativa para o comezo do curso. Así o anunciou a alcaldesa que informou que se atopa en marcha o proceso de inscricións. A escola infantil ten capacidade para corenta alumnos e, na actualidade, quedan aínda prazas libres.
MUROS> O voto favorable do BNG e a abstención do PP permitiu ó executivo de Muros aprobar a proposta de dedicacións e retribucións dos membros do goberno. A alcaldesa asumirá unha dedicación exclusiva de tres mil euros mensuais, mentres que os dous edís delegados ostentarán unha parcial de mil douscentos euros cada un.
MUROS> Esteiro prepárase para a súa gran cita festiva do verán. A vixésimo oitava edición do Gran Prix de Carrilanas volverá atraer a miles de visitantes ata a localidade muradá esta fin de semana. Un motivo máis para acadar a declaración de festa de interese turístico nacional que levan anos solicitando.
MUROS> Malestar en Muros ante a negativa de Portos a ceder o espazo para a celebración das festas de San Pedro. O concello non descarta o cambio de ubicación das atraccións se finalmente non obteñen o permiso. O que teñen claro é que as festas si se celebrarán.
MUROS> En Muros está convocada para mañá venres unha xunta de portavoces na que está previsto fixar o día e a hora do pleno de organización.Unha das principais novidades introducidas polo novo goberno que preside en minoría María Xosé Alfonso figura a proposta de celebrar os plenos con carácter mensual, os últimos xoves de cada mes. Ademais a súa intención pasa tamén por posibilitar a entrada de tódolos grupos da oposición ás xuntas de goberno local. Así estarían representadas por un membro de cada formación, á que se sumaría a propia rexedora. O novo executivo ten intención tamén de prescindir de asesores externos, limitándose unicamente a ter unha persoa que se encargará de representar ó concello nos asuntos xudiciais, e que cobraría en función do traballo realizado. En canto ás dedicacións, está previsto dispor de tres, que serán a xeito parcial, para os tres membros do goberno e non superarán no seu total os catro mil euros. A alcaldesa María Xosé Alfonso, que sinalou a súa intención de seguir compatibilizando o seu traballo de docente co de rexedora, percibiría uns 1.600 euros, mentres que os outros dous edís de CxG no goberno: José Manuel Quintela e José Antonio Uhía, 1.200 cada un. Ademais os membros da corporación non recibirían indemnización algunha por asistir a xuntas de goberno e comisións informativas e só trinta euros por cada pleno no que participasen.
MUROS> O Centro Tecnolóxico do Mar-Fundación CETMAR e os seus socios no proxecto RAIA.co teñen previsto ampliar a súa rede de observación oceánica transfronteiriza coa instalación dunha nova boia na ría de Muros. Únese así ás estacións xa existentes en Cortegada, na Illa de Rúa, en Rande, na Borneira, nas Illas Cíes e na Guarda. A posta en marcha deste novo aparello permitirá coñecer o estado do mar na ría de Muros-Noia, servindo de apoio ós labores de pesca e marisqueo que se veñen realizando habitualmente na zona. A nova boia, de máis de dous metros de diámetro e de tres metros e medio de alto, foi fondeada hoxe ó sureste de Muros. Disporá de sensores que recollerán datos tanto meteorolóxicos coma oceanográficos. A información recompilada por esta boia estará dispoñible en tempo real a través das páxinas web de INTECMAR e MeteoGalicia.
Publicado en portada
MUROS> María Xosé Alfonso estreouse como alcaldesa de Muros despois do repentino cambio de rumbo propiciado pola votación favorable do PSOE no pleno de investidura. Contra todo pronóstico, os socialistas renunciaron a presentar candidatura propia e votaron á cabeza de lista de Compromiso por Galicia.
HomeMostrando artigos por etiqueta: Muros Top of Page

Síguenos en facebook