09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
CANAL RÍAS BAIXAS  :: Información local
NOIA> A maioría dos produtores conseguiu coller sen dificultade os topes establecidos. A única desconfianza para eles, o prezo que o marisco puidera acadar en lonxa... A maioría dos mariscadores confían en que o episodio de toxina non volva a producirse, algo que non poden asegurar con rotundidade, e así poder manter un nivel aceptable de ingresos, xa que o mercado se atopa practicamente desabastecido, tanto para fresco como para as conserveiras.
LOUSAME> O investimento irá destinado, na maioría dos casos, á melloras de viais. Ás portas da casa consistorial, o presidente da Deputación da Coruña, Valentín González Formoso, foi recibido pola alcaldesa, Teresa Villaverde, así como tamén outros membros da corporación municipal. Esta era a primeira visita que o presidente provincial realizaba a este municipio, e tiña coma principal finalidade coñecer as obras levadas a cabo neste último ano, e que foron financiadas con cargo ó Plan Único cun investimento total de máis de 743 mil euros. Trátase, na maioría dos casos, de obras de mellora de viais, coma a realizada no camiño ó complexo medioambiental de Servia ou no de Crons á Igrexa de Camboño. Durante a visita, o presidente e a alcaldesa visitaron tamén o aceso a Berrimes, xa renovado, e os parque infantís de Portobravo e Escabia, mellorados tamén con cargo a outros plans da Deputación, como tamén o foron os os acondicionamentos dos locais sociais de Aldea Grande, Béxeres, Vilacova, Escabia e Lesende. A rexedora aproveitou a presenza do presidente provincial para pedir tamén o seu apoio para dous proxectos como son o arranxo da estrada de Comparada a Ponte Beluso e unha nova fase da estrada de Portobravo ó Confurco, pasando por Aldea Grande e Chave. O presidente provincial informou tamén de que este mesmo mes xa se iniciaron os trámites de expropiacións para a ampliación e mellora da DP-4.201 en Aldea Grande, cun presuposto de 304 mil euros e tamén se levou a cabo o inicio do proceso das expropiacións necesarias para a construción dunha nova ponte sobre o rego Pesqueira, na estrada DP-4.202 de Aldea Grande ó Couto cun orzamento de 267 mil euros.
BARBANZA/NOIA> Os populares valoran moi positivamente os orzamentos da Xunta para o vindeiro ano 2018 cun investimento previsto para a comarca que supera os doce millóns de euros. Máis de doce millóns de euros. Esta cantidade é a que a Xunta de Galicia prevé investir na comarca do Barbanza para o ano que vén. Uns datos que dende o Partido Popular consideran moi positivos. O deputado, Carlos López Crespo, referiuse a algunhas das partidas máis importantes. Así destacou os case 4,5 millóns de euros para a construción da EDAR de Rianxo, os 1,7 millóns de euros para a mellora dos pantaláns dos bateiros de Cabo de Cruz ou os 1,4 millóns para o desenvolvemento do borde portuario en Porto do Son. Tamén se prevén outras actuacións como son diversas melloras no saneamento de Lousame, uns 200 mil euros, o proxecto para a ordenación viaria de acceso ó porto de Ribeira, 475 mil ou a reforma integral da praza de abastos de Noia, 150 mil. Aínda así nesta última comarca, a maior parte do investimento será destinada ó desdobramento da autovía, que contará cunha partida neste 2018 de 250 mil euros para o inicio da redacción do proxecto, e para o que as contas autonómicas recollen un investimento total de 15 millóns de euros ata o ano 2021. Dende as filas populares destacouse ademais que as contas presentadas polo Goberno Galego prevén tamén un incremento notable en catro eixes fundamentais como son os servizos sociais, a sanidade, a educación e a creación de emprego.
NOIA> Os mariscadores confían en que a situación varíe e poder volver a semana que vén ó traballo. Malas novas para os mariscadores noieses. A presenza da marea vermella obrígaos a manter paralizada uns días máis a campaña extractiva. As últimas análises realizadas polo pósito e remitidos tanto a Intecmar como a un laboratorio privado evidencian a presenza de toxina na Ría. As chuvias caídas nos últimos días e a baixada de temperaturas parece que axudaron a rebaixar os niveis da marea vermella, pero aínda será necesario que baixen un pouco máis para poder abrir as concesións. A intención do pósito noiés pasa por volver a repetir estas probas nos próximos días, pero xa a últimos de semana, parece xa bastante complicado esta semana, ó ter que producirse dous resultados negativos consecutivos. Son xa máis de dúas semanas que os mariscadores non poden saír a faenar, o que supón para eles unha considerable merma de ingresos. As cifras que manexa a propia Confraría rondarían os tres millóns de euros O patrón maior Santiago Cruz lamentaba esta situación, aludindo á pouca sorte que volver a ter coa toxina, repetindose unha situación moi semellante á vivida o pasado ano. Por esta razón, dende o pósito noiés estanse a estudar tamén outras alternativas para que as consecuencias no sean tan graves en episodios futuros. Unha das medidas a introducir sería a realización das análises tmén nas fin de semana para evitar situacións como as vividas o pasado tres de outubro, na que os mariscadores realizaron o seu traballo habitual, e unha vez en terra decretouse o peche dos bancos, polo que o houbo que devolver o produto ó mar.
NOIA> Dende a entidade entenden que os mariscadores non son culpables da situación vivida ese día cando se decretou o peche dos bancos marisqueiros unha vez xa de volta de faenar. Uns trescentos mil euros. Esa é a cantidade que Plademar lle reclama á consellería do Mar por ese primeiro día de traballo. Ese día sairon a faenar como calquera outro, pero pola tarde o Intecmar decretou o peche dos bancos marisqueiros pola presenza de toxina, o que obrigou a devolver todo o marisco collido ese día ó mar. Dende Plademar consideran tamén necesario que a Consellería cree un protocolo para este tipo de casos. Outra das súas demandas radica na necesidade dun cambio do actual sistema de comercialización. Dende a Plataforma confían en que a situación no mar mellore, e así a finais desta semana poder iniciar a súa actividade despois de máis de dúas semanas sen poder facelo.
MUROS> Con esta actuación pretende evitar a súa caída debido ó seu avanzado estado de deterioro. Trátase dun dos edificios máis emblemáticos do Concello. Dende hai anos vén padecendo un imparable deterioro que, nas últimas semanas foi en aumento, debido ó derrubamento de parte da súa cuberta. Ante o perigo a que as caídas vaian a máis, e tamén como medida de seguridade pública de cara ás persoas que poidan transitar pola zona, o executivo procedeu ó seu apuntalamento. Esta actuación é un pequeno parche. Aínda así o Concello non descarta iniciar con urxencia a súa rehabilitación. Para iso volverá a iniciar unha rolda de contactos coas distintas administracións de cara a buscar o financiamento necesario para poder levala a cabo, xa que o proxecto sería inasumible unicamente con fondos propios.
NOIA> O torneo, organizado pola Federación Galega de Baloncesto e o Club Baloncesto Noia, disputarase este domingo no pavillón Alonso Rodríguez. Catro equipos: o Obradoiro-Peleteiro, o Estudiantes de Lugo, o Club Baloncesto Tui e o Instituto Rosalía disputaranse este próximo domingo o título da Copa Galicia en categoría junior. Os encontros disputaranse no pavillón Alonso Rodríguez. A partir das dez e media da mañá xogarase a primeira semifinal, e dúas horas máis tarde a segunda. Pola tarde, a partir das cinco e media terá lugar o partido polo terceiro e cuarto posto e ás sete e media está prevista a final do torneo. A organización desta cita deportiva corre a cargo da Federación Galega de Baloncesto e o Club Baloncesto Noia.
MUROS> A CIG mostrou o súa preocupación polo traslado da conserveira Calvo. O anuncio do grupo conserveiro Calvo de pechar e trasladar a Carballo a planta de Esteiro preocupa á CIG. Dende este sindicato apostan polo mantemento, primeiro da actividade na factoría muradá, e en segundo lugar da conservación dos actuais postos de traballo, coincidindo, en principio, coas propias intencións da empresa. Dende a CIG consideran que a situación é un auténtico mazazo para a comarca. Todo apunta a que xa non haberá marcha atrás na decisión da empresa e o peche da factoría parece xa insalvable. Outra cousa son as condicións dos traballadores. O comité negocia agora coa dirección unha serie de melloras como poden ser o 100% da liquidación para aqueles operarios que rexeiten irse a traballar a Carballo ou que o tempo investido no traxecto, ó redor dunha hora de percorrido, compute tamén na xornada laboral.
PORTO DO SON> Os socialistas quéixanse de que, no que vai de ano, non se incluiron na orde do día dos plenos as súas iniciativas, a pesar de telas rexistradas en tempo e forma. Para o grupo municipal socialista esta situación é un exemplo máis da censura que está a levar a cabo o grupo de goberno cos grupos da oposición. Segundo eles no que vai de ano na orde do día dos plenos non se incluíu ningunha das súas mocións, presentadas en tempo e forma. Poñen como exemplo a situación vivida na última sesión plenaria na que faltaron as súas tres propostas, unha para dar viabilidade á piscina municipal, outra solicitando un plan municipal de educación e outra na que pedían mais medios materiais e formación para a loita contra a praga da vespa velutina. Despois de pedirlle as correspondentes explicacións ó equipo de goberno por esta situación, non descartan acudir ó Valedor, ante o que consideran un continuo entorpecemento ó seu labor coma concelleiros.
NOIA> Esta pasada fin de semana remataba o prazo de presentación de traballos para a próxima edición do festival. Máis de 1.200 traballos. A maioría deles na sección de ficción. Unha cifra importante e que vén a demostrar o enorme interese que levanta este certame audiovisual. A súa procedencia do máis dispar. En total uns 42 países diferentes, entre os que se atopan a India, Hong Kong, Taiwan, Australia ou mesmo Canadá. Todos competirán por facerse coa estatuilla da Mostra de Curtas "Vila de Noia", que servirá como pasaporte para os próximos premios Goya, xa que este ano é festival volverá a ser colaborador. As curtametraxes seleccionadas serán anunciadas o próximo 9 de outubro e serán proxectadas durante a semana do festival, que terá lugar do 1 ó 11 de novembro.
NOIA> A razón que explica este éxodo é a merma de ingresos que padecen nas súas concesións. Algo chamativo pero totalmente legal. Nos últimos anos, e cada vez máis, as confrarías arousás están a notar unha baixa importante no número dos seus socios. Estas baixas coinciden ademais coa apertura da campaña extractiva en Noia prevista para este próximo luns. Os produtores arousáns alugan ou compran a armadores noieses a súa embarcación co permiso correspondente para poderen traballar nas súas concesións. O éxodo vén provocado fundamentalmente pola merma de ingresos no libre marisqueo. Algo totalmente legal. Trátase fundamentalmente de mariscadores de Rianxo, Cabo de Cruz, Cambados ou a Illa. As boas expectativas para o inicio da campaña en Noia provoca que cada vez sexan máis os que deciden cambiar de aires e buscarse a vida pagando importantes cantidades de diñeiro. E aínda así compénsalles.
NOIA> Os nacionalistas fan esta solicitude a cinco anos vista para o remate da concesión que a Mancomunidade Serra do Barbanza mantén coa firma FCC. Para o BNG nestes anos da man de FCC vivíronse situacións esperpénticas, na que os máximos prexudicados polo servizo de recollida do lixo foron os propios veciños, queixándose do trato que a empresa dá ós concellos que integran Serra do Barbanza. Para os nacionalistas unha das mellores opcións sería a xestión directa do complexo. Ademais avogan por unha mellora do servizo que se presta a través da ampliación e renovación da planta de Servia, hoxe totalmente obsoleta, así como que se estude a viabilidade da entrada doutros concellos da zona á entidade como poden ser Rianxo, que xa mostrou interese, ou Outes.
HomeMostrando artigos por etiqueta: MurosNoia Top of Page

Síguenos en facebook