09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
CANAL RÍAS BAIXAS  :: Información local
NOIA> A delegación estaba conformada por 120 alumnos e profesores de distintos institutos europeos e tamén de México participantes no campus xuvenil de carácter internacional integrado no proxecto Climántica, liderado polo instituto Virxe do Mar da localidade. A recepción no Concello, era unha máis das citas da ampla axenda que a delegación de participantes no campus xuvenil de carácter internacional Educocean que pretende dar respostas educativas ó problema do cambio climático, no marco do proxecto europeo Climántica que lidera ende hai uns dez anos o IES Virxe do Mar. Son en total unhas 120 persoas, entre profesores e alumnos, de países tan dispares como México, Polonia ou Portugal, e no que participan tamén centros educativos de diversas comunidades españolas, incluíndo Galicia. A delegación acaba de chegar da localidade lusa de Aveiro, onde se desenvolveu a primeira fase do proxecto. O alcalde, Santiago Freire, destacou a importancia deste proxecto, ó tempo que agardou que que experiencia sexa proveitosa para todos. Esta tarde tiñan previsto realizar diversas actividades na zona de Testal, unha visita ó casco histórico da vila e coñecer tamén os traballos do marisqueo. A xornada rematará mañá coa proxección das curtas seleccionadas no marco do proxecto e unha festa final.
NOIA> O documento servirá de guía para a elaboración dun plan de eficiencia e aforro do consumo enerxético. Noia dispón de máis de catro mil puntos de luz en todo o municipio, a maioría delas antigas lámpadas de vapor de sodio e mercurio. A cifra puido ser coñecida a través da auditoría e inventariado do sistema eléctrico municipal encargado polo executivo. O documento servirá de guía para a elaboración dun plan de eficiencia e aforro do consumo enerxético. Unha das próximas actuacións será precisamente a renovación desas lámpadas antigas por outras máis modernas de tecnoloxía led para conseguir así un maior aforro para as arcas municipais. Para levar a cabo este proceso, o Concello agarda poder acollerse a unha liña de subvención do Ministerio de Industria, a través do IDAE.
NOIA> A Consellería de Infraestruturas e Vivenda, a través da Dirección Xeral de Mobilidade, investirá máis de 140 mil euros na renovación da estación de autobuses de Noia, cuxas obras comezarán nas vindeiras semanas. As obras teñen como finalidade a mellora da cuberta, o acondicionamento de fachadas e as reparacións de distintos elementos que afectan tanto ó edificio principal como ó resto da estación.As actuacións están enmarcadas nun contrato máis amplo que tamén inclúe a reparación das estacións de autobuses de Cambados e Sanxenxo, cun investimento total que ascende a máis de 217 mil euros.
NOIA> O festival desenvolverase os días 17 e 18 de agosto na Praza do Cantón a partir das dez da noite. En caso de chuvia será trasladada ó interior do Coliseo Noela. Trátase dunha das actividades consolidadas dentro da programación deseñada pola concellería de Cultura para o verán, que chega este ano á súa oitava edición. O festival NoiaJazz desenvolverase os próximos 17 e 18 de agosto na Praza do Cantón. O primeiro día tocarán Tato Vázquez Trío e Alfonso calvo Sextet e o segundo día actuarán Ejazz Grupo Vocal, Raynald Colom e Kin García Trío. O director do festival, Kin García, destacou o seu alto nivel musical con figuras consagradas deste tipo de ritmos a nivel internacional como é o caso de Raynald Colom. Dende a organización quixeron agradecer tamén ó artista local, o pintor Veiras Manteiga a súa colaboración unha vez máis desinteresada co festival, ó ser el o creador do debuxo do cartel.
NOIA> A proba, organizada polo Club Atletismo Noia, prevé mellorar a participación das edicións anteriores. Todo preparado en Noia para acoller a vinte e unha edición da carreira popular pedestre. A cita terá lugar o próximo domingo 2 de setembro. Como vén sendo habitual estará organizada polo Club Atletismo Noia, que contará coa colaboración do Concello e de varias casas comerciais. O trazado deste ano será idéntico ó da edición anterior, non demasiado esixente cunha lonxitude total duns nove quilómetros. A característica máis singular é que discorrerá de noite. O que sen dúbida a fará máis atractiva. Dende o Concello destacaron a importancia deste tipo de citas deportivas, que congregan a un gran número de persoas, e serven, ademais do aspecto puramente deportivo, para dar a coñecer a localidade. A organización márcase como reto este ano chegar ós oitocentos participantes sumando tódalas categorías dende os chupetes ata os senior e veteráns. O prazo de inscrición xa está aberto ata o día 1 de setembro a través da páxina web www.emesports.es.
MUROS> A actuación está incluída nas obras do POS Plus da Deputación da Coruña. Esta mañá a xunta de goberno local aprobaba dúas actuacións incluídas no POS + da Deputación da Coruña para este ano e cuxa execución será inminente. A primeira delas consistirá no arranxo dos actuais nichos no cemiterio municipal da Atalaia e a súa ampliación, cun novo módulo de nichos, así como tamén a mellora da accesibilidade ó recinto. Segundo a propia alcaldesa, María Xosé Alfonso tratábase dun vella demanda por parte dos veciños. A outra das actuación aprobadas hoxe prevé a mellora dos accesos ó núcleo de Torea.
LOUSAME> Como é tradición, numerosos veciños achegáronse ata a capela onde se venera a este santo, na parroquia de Tallara, para participar nos actos litúrxicos e disfrutar dun xantar campestre. Dende primeiras horas da mañá numerosos veciños deste Concello, así como tamén de municipios lindeiros, achegáronse ata o entorno da capela de San Lourenzo en Tallara para asistir, como é tradición, ós actos na honra de San Lorenzo. Aínda así non foi ata a unha do mediodía, cando tivo lugar o acto principal da xornada, coa celebración da misa solemne e posterior procesión na que o santo estivo tamén acompañado de San Mamede, a quen xa se lle rendera culto na xornada anterior. Moitas das persoas que asistiron ós actos litúrxicos aproveitaron tamén a xornada para disfrutar dun xantar campestre en familia. O bo tempo e a beleza do enclave axudaron tamén a prolongar esta data festiva con tanto arraigo no municipio, na que tampouco faltou a música, da man da charanga Tíralle do Aire e o grupo de gaiteiros O Son do Pote.
NOIA> O proxecto de construción do novo museo do mar de Noia permanece paralizado á espera de remitir un informe a Patrimonio sobre os novos restos arqueolóxicos aparecidos trala demolición do antigo inmoble. Ademais de parte da muralla medieval, vestixio co que xa contaban os técnicos, apareceu o peirao de acceso e un treito de calzada.
NOIA> A Axencia Galega de Turismo e a Asociación Rural de Desenvolvemento da Ría Muros Noia asinaron un convenio de colaboración para a promoción do xeodestino. Establece unha achega de preto de cincuenta mil euros para a potenciación conxunta dos cinco concellos que componen esta bisbarra.
PORTO DO SON> A Xunta de Galicia investiu máis de trinta mil euros nas obras de mellora da accesibilidade do CEIP Santa Irene en Porto do Son. O delegado territorial na Coruña supervisou esta mañá os traballos consistentes na construcción dun baño adaptado e a dotación de rampas nos accesos ás aulas e á biblioteca.
NOIA> A cita, que se celebrará esta fin de semana, reunirá a numerosos afeccionados ó mundo das dúas rodas. Organizada pola Asociación Mototurística Ría de Noia, a concentración cumpre este ano a súa décima edición. Por esta razón o programa de actividades deseñado para a fin de semana será do máis variado, incluíndo importantes novidades, como é o caso da espectacular actuación de freestyle a cargo do campión mundial, Dany Torres, e o piloto internacional, Pedro Moreno, que se desenvolverá xa o venres na zona de Labarta. Dende o Concello destacaron a importancia desta cita, xa un referente na comarca, que de seguro atraerá a miles de visitantes á vila.
NOIA> Segundo a formación ás débedas son do último ano e ascenden a uns 350 mil euros. Dende a Marea de Noia sinalan que a falla de xestión do actual executivo está a provocar que o Concello leve máis dun ano sen pagar facturas por un importe que rondan os 350.000 euros. Trátase segundo eles de débedas nas que a maior parte son emitidas por pequenas emedianas empresas da vila. Dende a Marea aseguran ademais que o modelo da adxudicación directa da obra menor leva a que a maioría das empresas non poidan nin tan sequera presentar propostas de orzamento para a realización de obras ou servizos, polo que quedan excluídas das distintas contratacións de menos importe. Segundo eles a maior parte son obras de mantemento e reparación de estradas, creación de memorias e estudos, organización de eventos, onde o goberno de Noia adxudica obras directamente. Dende a formación nacionalista sinalaron que xa mantiveron distintas xuntanzas con empresas que levan máis dun ano sen cobrar, poñéndoas en situacións económicas complicadas ó ter que asumir as súas obrigas con menos ingresos dos agardados . por esta razón instan ó equipo de goberno a que priorice o pago destas débedas contraidas, en vez de levar a cabo outros investimentos, permitindo que tódalas empresas que o desexen poidan ofertar en calquera obra mediante a publicidade das distintas contratacións que se leven a cabo.
HomeMostrando artigos por etiqueta: MurosNoia Top of Page

Síguenos en facebook