09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
CANAL RÍAS BAIXAS  :: Información local
LOUSAME> A actuación, na que se empregaron técnicas novidosas de bioenxeñería, ascendeu a preto dos 35 mil euros. O director de Augas de Galicia, Roberto Rodríguez, e o delegado territorial da Xunta na Coruña, Ovidio Rodeiro, visitaron esta mañá, xunto coa alcaldesa de Lousame, Teresa Villaverde, as obras levadas a cabo nas últimas semanas na ribeira do río Tállara, ó longo dun quilómetro de lonxitude. A actuación, na que se investiron preto dos 35 mil euros, tiña coma principal finalidade a conservación da propia canle do río, coa construción de tres noiros. Segundo explicou o director de Augas de Galicia a execución destes traballos realizouse mediante técnicas novidosas de bioenxeñería. Os traballos tamén levaron aparelladas tarefas de limpeza e de conservación, que consistiron na retirada de material e restos vexetais depositados no leito do río, co fin de evitar atrancos e episodios de asolagamentos no futuro.
NOIA> A busca de José Manuel Pazos Ferrín, de 43 anos, iniciábase hai uns días despois de que a súa familia denunciase a súa falta. O home, que necesitaba medicación, fora visto por última vez en Serra de Outes. Ó parecer atopábase no hospital en bo estado, polo que se deu por finalizado o operativo de busca, segundo confirmaron fontes de SOS Desaparecidos, a asociación de axuda e difusión de casos de persoas desaparecidas.
LOUSAME> As actuacións previstas incluirán a construción dun patio cuberto e a renovación do parque infantil público existente no interior do recinto. O proxecto de cuberta exterior no colexio Cernadas de Castro será asumido pola consellería de Educación e consistirá na creación dun patio cuberto no que se empregará policarbonato celular e paneis nervados, un material axeitado para as condicións climatolóxicas da zona. O patio, que permitirá que o alumnado do centro conte cun espazo máis amplo para as actividades no exterior sen depender da meteoroloxía, está orzamentado nuns 60 mil euros. En canto á outra actuación prevista, a da renovación do parque público existente no centro, ascenderá a uns 63 mil euros, dos que a consellería da Vicepresidencia achegará uns 40 mil e a cantidade restante será asumida polo propio Concello. Entre os traballos a desenvolver figuran a renovación dos elementos de xogo existentes e a colocaión doutros novos, cumpríndose así as medidas de prevención de riscos e de seguridade deste tipo de espazos.
NOIA> Máis de vinte e tres empresas concorreron ó proceso de licitación das obras do pavillón do colexio Felipe de Castro, en Noia. Está instalación dará servizo tamén a outros clubs e entidades da zona fóra do horario lectivo.
OUTES> O concello de Outes celebrou esta fin de semana a festividade de San Cristovo. Á tradicional procesión de coches entre A Serra e O Freixo seguiulle unha multitudinaria sardiñada na que se repartiron máis de mil quilos de peixe.
NOIA> O técnico redondelán, que volverá ós banquiños despois de ano e medio de inactividade, mostrouse ilusionado con esta nova experiencia á fronte do conxunto noiés na Segunda División do fútbol sala a nivel nacional. O Noia Portus Apostoli Fútbol Sala xa conta con novo adestrador. Trátase de Julio Mougán. O técnico redondelán será o encargado de guiar a nave noiesa a próxima tempada na Segunda División, competición na que xogará por primeira vez na súa historia. Acompañado do presidente, Severino Barreiro, e tamén do director técnico do Club, Javi Barreiro, foi presentado esta mañá en rolda de prensa na sede dun dos seus principais patrocinadores, Grúas Egalsa. No acto, no que tamén estivo presente o edil de Deportes Ramón Santos, explicáronse as razón da súa elección. Mougán, un técnico cualificado e con ampla experiencia na categoría, mostrouse ilusionado con este novo proxecto. Entre os seus obxectivos figura manter o equipo na categoría de prata. Un reto complicado pero que agarda poder cumprir coa implicación de todos, en especial coa dos xogadores. O Club xa traballa na configuración do plantel, no que se prevé a continuidade da base do grupo do ano pasado, coa incorporación de catro ou cinco caras novas que lle virán a dar un salto de calidade ó equipo.
MUROS> A actuación, que virá a solucionar as graves deficiencias que presenta o paseo marítimo, ascende a preto do millón de euros. A alcaldesa, María Xosé Alfonso, confía en que nas próximas semanas se inician as obras de remodelación do paseo marítimo de Esteiro. Unha obra pola que levan agardando dende hai tempo xa que a infraestrutura presentaba un avanzado estado de deterioro. O custe da actuación rondará o millón de euros. Unha cantidade que será asumida pola propia Demarcación de Costas, ente dependente do Ministerio de Medio Ambiente. O executivo agarda que se acometa a actuación á maior brevidade posible xa que o paseo segue pechado ó transito a día de hoxe.
NOIA> Éxito de público da Feira Medieval de Noia que, nesta vixésima edición, atraeu ata a vila a miles de visitantes. Como novidade, o programa incluíu unha arribada de peregrinos que, a través dunha marcha nocturna, reivindica o papel histórico da vila como Portus Apostoli.
MUROS/NOIA> As eivas no servizo de recollida de lixo nos concellos da Mancomunidade de Municipios Serra do Barbanza continúan para desesperación dos veciños. As desavinzas entre FCC e a Mancomunidade de Municipios Serra do Barbanza, entidade que xestiona a planta de recollida de lixo de Lousame, que empregan, ademais deste último municipio outros concellos coma o de Muros, Porto do Son ou Noia, están a crear novos problemas no servizo de recollida de lixo. Non era un problema novo. As constantes avarías nos vehículos que a empresa utiliza e que non poden realizar a súa tarefa, están a provocar que o lixo se acumule de xeito notable a carón dos contedores. A situación está a provocar un gran malestar entre os veciños destes concellos, que non entenden as razóns que se están a dar para xustificar esta situación. Temen que se produza un problema grave de saúde pública, máxime coas altas temperaturas destes días Algúns grupos políticos como é o caso do Partido Popular de Muros estánse a facer eco desta problemática. A súa voceira Inés Monteagudo vén de esixirlle á Mancomunidade do Barbanza e tamén ó propio goberno municipal que adopten as medidas urxentes necesarias que permitan terminar dunha vez por todas cos problemas que existen no servizo de recollida de lixo do municipio. Tamén a Marea de Noia lle solicitou ó alcalde que se decrete unha intervención temporal para garantir a salubridade das rúas ata que se arranxen os camións e así, na fin de semana, na que a vila celebra ademais a súa feira Medieval, non se acumulen máis lixo.
NOIA> A actuación, coa que se busca transformar a fachada marítima da vila, contará cun investimento duns 60 mil euros. Unha vez que a terceira parte do proxecto ‘As Portas do Mar’ está prácticamente lista, o executivo noiés xa elaborou un novo proxecto para acometer unha cuarta e definitiva fase para esta actuación que busca a humanización e o empedrado da fachada marítima da vila. Paralelamente a actuación levará consigo tamén outro proxecto que busca disimular de algún xeito a zona de contedores do lixo existentes na zona, mellorando o aspecto visual da rúa.
A Dirección Xeral de Conservación da Natureza investiu preto de sesenta mil euros na recuperación da senda fluvial do Rego das Cunchas en Noia. A intención do concello é darlle continuidade á actuación coa rehabilitación dos muíños da zona. Off A actuación permitiu mellorar a senda peonil que, ó longo de aproximadamente un quilómetro, conecta o conxunto etnográfico dos once muíños do rego das Cunchas, na parroquia noiesa de Santa María de Roo. Ademais do incremento da seguridade, o investimento autonómico permitiu a instalación de paneis e mesas informativos sobre a historia e funcionalidade dos muíños así como sobre a fauna e flora da zona. Este sendeiro enmárcase nun espazo patrimonial de gran interese como é a Central Hidroeléctrica do Tambre. Trátase dunha primeira fase que podería ter continuidade coa rehabilitación dos muíños.
MUROS> Representantes de tódolos grupos da corporación municipal de Muros reuniranse este martes con responsables do Colexio de Rexistradores da Propiedade para abordar a perda de calidade deste servizo. Denuncian que a oficina de Muros converteuse nunha mera sucursal de Corcubión.
HomeMostrando artigos por etiqueta: MurosNoia Top of Page

Síguenos en facebook