• Facebook
  • Twitter
  • Rss
  • Plus
CANAL RÍAS BAIXAS  :: Información local
OUTES> A comunidade educativa anuncia que non parará ata conseguir a anulación da medida por parte de Educación. Con berros coma este....a comunidade educativa do CEIP Emilio de Navasqüés de Outes oponse á decisión da consellería de Educación de pechar o centro para o vindeiro curso escolar. Unha decisión que ninguén agardaba e que mesmo os colleu por sorpresa, na véspera do inicio das vacacións. Visiblemente emocionada a directora do colexio, Mercedes Cereijo, relatáballe ó resto de profesores, pais, familiares e veciños en xeral, que esta mañá acudiron en masa ó colexio atendendo a chamada realizada pola ANPA, como foi o anuncio desa drástica decisión da Xefatura Territorial, abrindo as portas á fusión co outro colexio do Concello, o CEIP da Serra de Outes. Dende a ANPA non entenden as razóns que levan a Consellería a tomar esta decisión sen previo aviso, máxime cando hai prevista unha matricula duns 72 nenos para o curso que vén. Tampouco entenden que dende o Concello se mire para outro lado e non se respalden as súas reivindicacións. A súa idea é seguir mobilizándose ata conseguir que se anule esta medida que consideran inxusta. Ademais dos escritos remitidos á Consellería demandando un cambio de postura na súa decisión, unha das primeiras accións a realizar foi a recollida de sinaturas de xeito presencial e tamén a través da plataforma change.org.
NOIA> A Patrulla Fiscal da Garda Civil de Noia procedeu á realización de varias inspeccións administrativas en distintos establecementos de Porto do Son e Noia. Netes locais interviron máis de 2.600 botellas de vidro e máis de 1.300 botes de Coca Cola por carecer da correspondente información ó consumidor en lingua oficial, sendo a súa posible orixe danesa ou francesa. Durante as inspeccións os axentes tamén se fixeron con 192 paquetes de tabaco de contrabando. Todo o material incautado foi precintado nos propios establecementos quedando a disposición da propia autoridade sancionadora.
NOIA> A proposta, que se enmarca no programa de cooperación interterritorial Galicia-Norte de Portugal, foi presentada esta mañá en Noia pola directora xeral de Xuventude, Cecilia Vázquez. A directora xeral de Xuventude, Participación e Voluntariado, Cecilia Vázquez, participou hoxe en Noia na presentación do proxecto de cooperación internacional Lidera, impulsado pola Xunta de Galicia e no que participan ademais outras entidades galegas e portuguesas. O obxectivo desta iniciativa non é outro que poñer en valor as capacidades laborais e de emprendemento da xente nova que reside, tanto en Galicia coma no norte de Portugal. A Dirección Xeral de Xuventude, Participación e Voluntariado actúa como actor principal desta proposta na que ten como socios galegos a Fundación Galicia Europa, a Cámara Oficial de Comercio de Santiago e a Asociación Comercial de Emprendedores de Galicia, Ascega. Na parte portuguesa, as institucións que participan son o Instituto Portugués do Deporte e da Xuventude, a Federación Nacional de Asociacións Xuvenís e a Comunidade Intermunicipal do Ave. O proxecto ten de prazo de execución ata o ano 2019 e levarase a cabo en tres fases principais denominadas Crece, Cataliza e Emprende. Entre outras sedes, na zona, ademais da de Noia, a Dirección Xeral de Xuventude porá a disposición do programa tamén o espazo xoven de Vilagarcía.
PORTO DO SON> Porto do Son acollerá entre o 29 de xuño e o 1de xullo as primeiras xornadas universitarias de odontoloxía. Acudirán ó redor dun cento de participantes de diversas universidades de España e Portugal.
OUTES> A xoiaría Fernando Gallego de Outes vén de obter o certificado Galicia Calidade. A directora xeral de comercio entregou este mediodía a distinción ó seu propietario. Esta marca de garantía aplicarase a dúas coleccións exclusivas deste innovador xoieiro.
PORTO DO SON> Porto do Son acollerá a segunda edición do Summer Camp de Fútbol Vero Boquete. Será entre o vinte e seis de xuño e o un de xullo. Ademais da sesións prácticas e teóricas de fútbol haberá actividades de lecer relacionadas cos deportes náuticos.
LOUSAME> O PSOE vén de interesarse no Parlamento Galego pola falla de pediatras nos centros de saúde de Noia e Lousame. Recollen así o malestar da veciñanza destes dous concellos ó entender que o servizo que se dá é deficitario.
LOUSAME> Os socialistas consideran que se trata dun novo despilfarro de diñeiro público. O inicio das obras de construción do novo vial que unirá Lousame, na zona de Portobravo, coa Vía de Altas Prestacións Brión-Noia está a levantar unha certa polémica. Segundo o grupo municipal socialista nesta localidade a actuación non suporá beneficio algún para os veciños do municipio, todo o contrario, xa que unha vez rematada deberá asumirá en maior medida o tráfico pesado procedente do vial que une Boiro e Noia. Os socialistas tamén denuncian a realización dunha nova actuación de rebacheo sufragada con fondos municipais na estrada de Servia a Fontefría, cando está prevista a súa mellora integral da estrada a través do Plan Único da Deputación da Coruña.
NOIA> O BNG de Noia denuncia o incumprimento da normativa urbanística nas obras que se están a acometer no casco histórico. Botan en falta os paneis informativos co número de licenza e os detalles da actuación.
NOIA> O deputado de En Marea, Antón Sánchez, levará ó Parlamento unha pregunta sobre as melloras previstas na Estación de Tratamento de Auga Potable de Noia para acabar cos problemas de turbidez. Piden que se dea cumprimento ó acordo asinado hai máis dun ano entre a Xunta e o concello para a construción dun novo depósito.
OUTES> A cita, que dende hai máis de vinte anos organiza o departamento de Servizos Sociais, celebrouse nunha carpa instalada na praza do bosque. Risas, anédotas e sobre todo moita diversión. Así foi como viviron este pasado sábado os maiores outenses a súa festa. Unha cita que dende hai máis de vinte anos organiza o Concello da man do departamento de Servizos Sociais. Como é xa tradición o xantar desenvolveuse na praza do Bosque, baixo unha carpa instalada para a ocasión. Na comida, que se encargou de sevir a empresa Veloso, tomaron parte unhas oitocentas persoas que puideron degustar empanada, polbo á feira, carne ó caldeiro e diferentes postres e licores. Non faltou á cita a alcaldesa, Beatriz Molinos, nin tampouco boa parte do equipo de goberno que coa súa presenza quixeron destacar e agradecer o traballo e o esforzo realizado por este importate colectivo do municipio, moi activo sempre con todas e cada unha das actividades que organizan dende o Concello. A cita, ademais de ser un momento moi especial para eles, serve tamén para que os maiores poidan aproveitar para intercambiar impresións cos membros do equipo de goberno e trasladarlle de paso as súas preocupacións e demandas. Como non podía ser doutro xeito a festa rematou con música e baile para todos. De seguro que moitos dos asistentes xa a botan de menos e pensan xa na vindeira edición.
NOIA> O concello de Noia recompila información para solicitar a declaración da ría como Patrimonio da Humanidade. Pretenden implicar ós outros catro concellos da comarca para converter á actividade marisqueira nun atractivo turístico máis.
HomeMostrando artigos por etiqueta: MurosNoia Top of Page

Síguenos en facebook