09d9te-f9a{h$?fow9pq(h/)5fh`8"e4w2fit;ryco2wo2n1fud=6"+n05uo.)vi$r2v7~<#;?k/c:6qe)>\
  • Facebook
  • Twitter
  • Rss
  • Plus
CANAL RÍAS BAIXAS  :: Información local
RIBEIRA> A cita, organizada pola Asociación de Veciños de Carreira, terá lugar o próximo sábado 2 de setembro. Organizada pola Asociación de Veciños de Carreira, en colaboración con outras entidades, entre elas Arousa NeO e o propio Concello, a andaina terá lugar o próximo 2 de setembro. A cita, que chega este ano a súa décimo quinta edición, presenta importantes novidades. Unha delas será que os participantes que o desexen poderán retirarse nos puntos quilométricos 18, 28 e 38, tres puntos do itinerario dende os cales se facilitará o transporte ó punto do saída, sen ter que facer os 50 totais da proba. O percorrido, igual que en anos anteriores, discorrerá por espazos singulares do Concello, con saída dende o polideportivo da Fieiteira transitará por A Garita, Couso, o Castro da Cidá, a ruta fluvial de Artes, ou o Dolmen de Axeitos entre outros. As inscricións xa poden realizarse a través da páxina web www.emesports.es ou en www.riveira.gal. O prazo remata o 31 de agosto.
RIBEIRA> Gran actuación de Ana Peleteiro nos Mundiais de Londres. A ribeirense acabou onte sétima na final de triple salto, cun rexistro de 14’23, a súa mellor marca persoal. Aínda así un golpe recibido no seu cuarto intento, impedíronlle estar na loita polas medallas, véndose obrigada a retirarse. Un golpe que en principio non reviste gravidade polo que poderá volver a competir en breve. A medalla de ouro na proba foi para a venezolana Yulimar Rojas cun salto 14,91, atleta coa que a ribeirense comparte adestrador, o cubano Iván Pedroso. A prata para a colombiana Caterine Ibargüen con 14,89 e o bronce para a kazaja Olga Rypakova que saltou 14,77.
RIBEIRA>s. Durante toda a xornada viviuse unha actividade frenética. A primeira subhasta, a do marisco, realizouse ás tres da tarde, mentres que a poxa do resto de capturas tivo lugar ás seis. A nova lonxa de Ribeira facía hoxe a súa posta de longo oficial coa apertura das instalacións. Foi un día de actividade frenética. Moitas das vendedurías que dende hoxe xa operan nas novas instalacións, realizaban esta mañá o traslado das súas pertenzas á súa nova ubicación. Traballo arreo tamén para os traballadores da empresa que a partir de agora levará a xestión da nova rula, e que substituirá ó Concello nese labor, así como tamén para os compradores, na súa maioría satisfeitos co cambio ás novas instalacións. A última hora da mañá foron chegando a maioría dos barcos, primeiro as embarcacións menores, que traballan no marisqueo, e posteriormente artes menores, arrastre e cerco. En cifras destacar os 30 mil quilos de lirio descargados, sendo a especie máis abundante. Seguida do xurelo e a xarda, que sumaron entre as dúas especies uns 29 mil quilos. O polbo foi a cuarta especie en canto a volume de descargas, cun prezo que rondou entre os tres euros e medio o máis barato e os 11´20 o máis caro. En canto ó marisqueo, na rula subhastáronse 321 quilos de ameixa rubia a un prezo medio de 8’18, 227 quilos de xapónica a 7’97 e 616 de navalla, que se pagaron a unha media de 6’86. Despois de máis de 25 anos de actividade, a vella lonxa pechou as súas portas definitivamente. Fíxoo despois dun ano no que se acadaron cifras históricas, con case 32 millóns de quilos de pescado e unha facturación de récord, que superou os 43 millóns de euros. queda pendente a partir de agora a que se destinarán esas vellas instalacións. Aínda que todo apunta a que poderían albergar a nova nave dos redeiros.
RIBEIRA> A música foi sen dúbida a gran protagonista dos festexos, que un ano máis reuniron a numerosas persoas. A programación das festas desenvolvida durante toda a fin de semana tratou de satisfacer os gustos de pequenos e maiores. Foron numerosas as actividades desenvolvidas, aínda que as que levantaron maior expectación foron sen dúbida as actuacións musicais. Unha delas foi a actuación de Merche na praza de España... Ademais de Merche, outros artistas e grupos de éxito achegáronse este ano á localidade para desfrute de moitos. Foi o caso de Treixadura, que onte domingo encargouse de poñer o broche final ós festexos... Como é tradición na tarde do sábado, a lonxa volveu a reunir a numerosos visitantes, que asistiron á celebración da misa na honra da Virxe do Carme. Trala misa, os fieis acompañaron á patroa do mar na tradicional procesión. Na tarde de onte tivo lugar a coroación das raíñas da flor que congregou a numerosos visitantes no adro da igrexa. Acto seguido, as raíñas e mailas súas damas percorreron as rúas da cidade nas súas carrozas. Xa pola noite, as festas dixeron o seu adeus ata o ano que vén coa tradicional tirada de fogos artificiais dende o peirao da localidade.
RIBEIRA> Está acusado dun delito de homicidio ou asasinato. Transcorridas apenas 48 horas dende a súa detención, Samuel V.P., de 38 anos e veciño de Boiro, pasaba esta mañá, ó redor das once e cuarto a disposición xudicial no Xulgado Número 2 de Ribeira. Entraba pola cocheira dentro dun vehículo policial. Para el a xuíza que leva o caso decretou o seu ingreso en prisión provisional e sen fianza por un delito de homicidio ou asasinato. O seu arresto producíase xa na madrugada do pasado luns, na propia vivenda da vítima en Triñáns. No interior da mochila que levaba, os axentes atoparon unha camiseta chea de sangue e un coitelo, co que ó parecer atacou á sesaxenaria. Fontes do propio Instituto Armado informaron de que se trata dun vello coñecido das forzas da orde fundamentalmente por tráfico e consumo de estupefacientes, así como tamén pola súa actividade coma furtivo.
RIBEIRA> A actividade desenvolverase durante os domingos de agosto nos catro concellos que integran a Mancomunidade. Un total de trece grupos de rexistros variados integran o cartel da segunda edición dos Vermús Musicais de Arousa Norte que esta mañá foi presentada en Ribeira. Unha iniciativa promovida pola propia Mancomunidade e organizada pola empresa A Pousada Producións. Desenvolverase tódolos domingos de agosto, incluíndo ademais as dúas primeiras fins de semana de setembro. Dende a Mancomunidade destacaron a importancia desta iniciativa, acollida con gran resposta o pasado ano, que busca a promoción dos artistas locais e a dinamización dos sector turístico. Os vermús musicais darán comezo xa este próximo domingo, con catro actuacións previstas á unha da tarde, en cada un dos concellos que integran Arousa Norte. Entre os músicos participantes na presente edición figuran Mr Cool e Tom Risco, Transilvanias, Juan Zelada, Davide Salvado ou Sonia Lebedynski. Artista esta último que para abrir boca xa nos ofreceu case en exclusiva un pequeno aperitivo da que será a súa actuación.
RIBEIRA> A firma, que foi a que resultou adxudicataria do concurso, asumirá a xestión do servizo de limpeza viaria no municipio por un período de doce anos. Xa hai data. O próximo 1 de setembro e por un período de doce anos, Recolte, Servizos e Medio Ambiente, firma que resultou adxudicataria da xestión do servizo de limpeza viaria no municipio, ten previsto iniciar o seu traballo. Fontes do executivo indicaron que o servizo irá implantándose progresivamente ó longo de seis meses, pasando do sistema de recollida actual a un novo modelo que incorpora a carga lateral nos camións e unha nova contenerización. A oferta presentada por Recolte, que ó final foi a mellor valorada no concurso, prevé tamén unha maior limpeza en parroquias, praias e paseos marítimos. A este respecto, cómpre sinalar que se inclúen dous tractores limpapraias que fóra da tempada de verán poderán ser empregados para favorecer os desbroces nas parroquias, ademais de incrementarse tanto a potencia como o número de barredoras. A firma xa presta os seus servizos en concellos como os de Marín e Padrón.
RIBEIRA> O primeiro semestre do ano deixa un balance máis que positivo na lonxa de Ribeira. Máis de catorce millóns de quilos descargados que se traduciron nunha facturación superior ós dezanove millóns de euros.
RIBEIRA> Boas novas de novo para o atletismo barbanzán. Ana Peleteiro vén de ser convocada pola Selección Nacional para participar en Londres, do catro ó 13 de agosto, nos Campionatos do Mundo de Atletismo. A atleta ribeirense achégase a estes Mundiais logo de estar a completar unha das súas mellores tempadas que a levarían a acadar a súa mellor marca persoal con 14 metros e 22 centímetros, o subcampionato de Europa sub-23 ou mesmo o Campionato de España desta pasada fin de semana. O concurso de Ana Peleteiro en Londres está fixado para o día cinco de agosto ás doce da mañá. Alí agardará facer un bo salto e meterse nas finais previstas para o día 7 a partir das nove e vinte e cinco da noite. Nos campionatos de Londres tomarán parte tamén outras dúas atletas galegas máis como son Solange Pereira e Belén Toimil.
RIBEIRA> Os festexos, que se desenvolverán do 2 ó 6 de agosto, terán coma pregoeiro ó actor, Ricardo de Barreiro. A edil de Cultura, Herminia Pouso, xunto con varios dos membros que integran a Comisión de Festas, foron os encargados de desgranar boa parte do programa das festas de verán deste ano. Os festexos desenvolveranse do 2 ó 6 de agosto e incluirán un amplo abano de actividades dirixidas a satisfacer a todo tipo de públicos. O pregón inaugural, dende o balcón da casa consistorial, correrá este ano a cargo do actor, Ricardo de Barreiro. Dende a comisión organizadora quixeron agradecer tamén tanto ó Concello como ás principais empresas colaboradoras e á hostalería a súa colaboración, para conseguir que as festas tiveran o mellor cartel posible.
RIBEIRA> O concello de Ribeira traballa na reestruturación do centro de saúde da localidade, que actualmente carece de espazo para albergar certos servizos. Trala visita da xerente da área sanitaria de Santiago, o alcalde manterá proximamente unha xuntanza con responsables do SERGAS para plantexar a reorganización e ampliación das instalacións.
BARBANZA> A ribeirense Ana Peleteiro proclamouse campioa de España de triple salto mentres que a pobrense Lidia Parada facíase co mesmo título na modalidade de lanzamento de xavelina. Bos resultados os acadados por estas dúas atletas barbanzáns nos campionatos de España en categoría absoluta ó aire libre celebrados esta pasada fin de semana en Barcelona. As dúas partían ademais coma principais favoritas nas súas disciplinas e non defraudaron. Tanto Ana Peleteiro coma Lidia Parada conseguiron revalidar o titulo acadado xa o pasado ano. A ribeirense fíxose coa medalla de ouro cun salto de 13’67, demostrando así o bo momento polo que atravesa. En segunda posición en triple salto quedou Fátima Diame e en terceiro lugar patricia Serrapio. En canto á pobrense Lidia Parada conseguiu o título cunha impresionante marca de 57 metros e 97 centímetros. O seu mellor lanzamento no que vai de ano, converténdose tamén na mellor marca española da tempada. Por detrás dela, moi lonxe do seu lanzamento, quedaron Arantza Moreno, segunda, e Nora Bicet, terceira.
HomeMostrando artigos por etiqueta: Ribeira Top of Page

Síguenos en facebook