• Facebook
  • Twitter
  • Rss
  • Plus
CANAL RÍAS BAIXAS  :: Información local
VILAGARCIA> A Xunta investirá 420.000 euros na formación de desempregados do concello de Vilagarcía. Esta mañá o delegado territorial en Pontevedra, acompañado do alcalde vilagarciá, presentaron os catro novos Obradoiros de Emprego, dous deles destinados a formar mozos en paro, como socorristas e auxiliares deportivos. En total son 35 as prazas que se ofertan para os catro obradoiro de emprego que o concello de Vilagarcía pretende poñer en marcha a partir de setembro. Os dous módulos destinados a maiores de idade son os de Carpintaría e Fontanería, con vinte prazas. E os dous obradoiros pensados para menores de 30 anos en paro, incluídos no programa Laborxoven, formarán a 15 mozos como socorristas e monitores deportivos. O delegado territorial da Xunta destacou a inversión realizada, uns 420.000 euros, da entidade autonómica, e algo máis de cincuenta mil por parte do concello, entre os catro obradoiros, debido á importancia de inserir a esta mocidade no mundo laboral. Cores Tourís destacou tamén no acto o dinamismo dunha comarca como o Salnés neste aspecto . No total da provincia de Pontevedra formaranse unhas 450 persoas en 23 obradoiros de emprego. Está previsto que estes novos obradoiros de Vilagarcía comecen a impartirse a partir do 15 de setembro.
Publicado en SALNÉS - CALDAS
RIBADUMIA> O concello de Ribadumia denuncia estragos na senda do Umia. Esta mañá, o goberno local e camiñantes atopábanse coa varanda da entrada dende a ponte de Cabanelas completamente arrincada. Os feitos xa se puxeron en coñecemento da Garda Civil. Esta mañá, Ribadumia amencía cunha desagradable sorpresa. Todos os valos que marcan unha das entradas á senda das marxes do Umia, dende a ponte de Cabanelas, foran completamente arrincadas. Non é a primeira vez que os vándalos danan o mobiliario urbano do concello. Un dos últimos episodios produciuse a semana pasada, cando actuaron sobre o alumeado. Os feitos xa foron denunciados ante a Garda Civil, que esta mañá achegouse ata o lugar para comprobar o sucedido, que conta co rexeitamento de todos os veciños. A intención do goberno local é que xa mañá comecen os traballos para repoñer os valos nos seus lugares canto antes.
Publicado en SALNÉS - CALDAS
VILAGARCÍA> Como xa se anunciara no pleno, o concello de Vilagarcía analizou onte cos diferentes departamentos implicados o plan de autoprotección presentado pola confraría de Carril para a Festa da Ameixa. Aínda que o patrón maior non puido asistir, o encontro celebrouse igualmente e, segundo explicaron dende o concello, son necesarias algunhas correccións para que o plan poida levar o visto bo. Os catro gardas de seguridade e a ambulancia propostos para a Festa da Ameixa de Carril no plan de autoprotección presentado polos seus organizadores, serían suficientes. Así o concluíron esta mañá o goberno local e os departamentos implicados na celebración. Unicamente serían precisas pequenas correccións para poder darlle luz verde. Estas deficiencias trasladaranse mañá ao patrón maior, José Luis Villanueva, que finalmente non puido asistir á reunión celebrada esta mañá no concello. Si que participaron nela, ademais de Emerxencias e Policía Local, os xefes de servizo de obras, xardíns, alumeado público ou comunicación. Falta de mesas, de valos ou de persoal de limpeza, son algunhas das dificultades que se atoparán, debido á falta de medios do concello para atender todos os eventos dos días 19 e 20. Onde os recursos municipais non cheguen, terá que ser asumido polos organizadores. Villanueva foi convocado a un novo encontro mañá ao mediodía, para trasladarlle as conclusións da reunión celebrada hoxe.
Publicado en SALNÉS - CALDAS
VILAGARCÍA> A polémica pola Festa da Ameixa de Carril chegou ao pleno. Representantes da comisión asistiron á sesión, cunha intervención do patrón maior, JOsé Luis Villanueva, para pedir o paoio da corporación para poder celebrar esta 25 edición da festa. PP, EU e Somos Maioría defenderon tamén as súas mocións de apoio á cita. O punto sobre a Festa da Ameixa de Carril xa comezou cos ánimos quecidos. Unha mensaxe no Facebook da Asociación de Parquistas desmentindo a presunta cancelación do pleno, provocaba o primeiro momento de tensión entre José Luis Villanueva e Alberto Varela. Os enfrontamentos sucedéronse durante a sesión. Xa durante a súa intervención, Villanueva asegurou que a situación que se está a vivir non é prato de bo gusto. Achacouna a un erro do concello por permitir coincidir tres celebracións a mesma semana, e reclamou os medios necesarios para levar adiante o seu programa. Partido Popular, Esquerda Unida e Somos Maioría chegaron á sesión tras presentar cadansúa moción para reclamar o apoio á Festa, que cumpre o seu vixésimo quinto aniversario. As formacións criticaron que o concello non se comprometa coa cita, e que non lles proporcione medios municipais a pesares da súa relevancia. As tres mocións votáronse de xeito conxunto, e saíron adiante grazas aos votos a favor de PP, Esquerda Unida e Somos Maioría e á abstención de BNG, Miguel Alves e Partido Socialista. Os nacionalistas e o edil non adscrito pediron cordura, que as partes flexibilicen a súa postura e insistiron en que o que debe primar é a seguridade. Varela defendeu, pola súa banda, que actúa defendendo o interese xeral. Durante a sesión o concello confirmou que dende hoxe xa ten no seu poder o plan de seguridade elaborado pola organización da Festa da Ameixa de Carril. Por iso, a comisión quedou emprazada a un encontro o luns para abordar o contido do documento.
Publicado en SALNÉS - CALDAS
CAMBADOS> Cambados goza xa de rede wifi pública e gratuíta. A vila estrea estes días este novo servizo, que chega para ofrecelo aos milleiros de persoas que pasarán polo concello a vindeira semana durante a Festa do Albariño. Iso si, dende a Mancomunidade e o goberno local xa explicaron que non é algo temporal, e que chega para quedarse. O centro de Cambados xa goza dunha rede wifi pública, gratuíta e de alta velocidade. Mancomunidade do Salnés e concello traballaron de xeito conxunto para poder ofrecer este servizo, que chega unha semana antes da Festa do Albariño. A idea naceu durante a visita que realizaron a finais de xuño á cidade alemá de Kiel. Pouco máis dun mes despois, Cambados xa conta con esta instalación, que requeriu da colaboración entre as dúas administracións. A Mancomunidade encargarase de cubrir os custos do servizo, que ademais chega para quedarse. Dende Cambados queren que se faga chegar ás parroquias, e a intención do órgano comarcal é levalo a todos os concellos. Paralelamente, o concello vén de conceder unha licenza a unha empresa para instalar fibra óptica no centro de Cambados. Na presentación, José Ramón Abal tamén informou de que o vindeiro 7 de agosto volverase reunir a comisión de seguemento da Cidade Europea do Viño, para valorar as actividades realizadas no mes de xullo, principalmente o Enobús.
Publicado en SALNÉS - CALDAS
CAMBADOS> Un verán máis, Martín Códax convértese nunha pequena galería de arte. A adega acolle nas súas instalacións a exposición A Maré, do artista cangués Lito Portela. Unha mostra deseñada especialmente para as instalacións cambadesas, e que xira ao redor do mar. Dende as instalacións de Martín Códax en Vilariño, as vistas son privilexiadas. Esta paisaxe namorou ao artista cangués Lito Portela, que aceptou a proposta de converter a adega nunha galería para a súa obra. Baixo o título de 'A Maré', as pezas que compoñen a mostra evocan o mundo do mar e a busca do que este deixa nas praias ao baixar a marea. Algo que tamén fai que para Martín Códax acoller esta exposición sexa algo especial. Os primeiros elementos apóianse no exterior da adega. Son as pezas que compoñen "Esperpentos", unha deformación da realidade que tamén fala da mentira. Xa no interior o visitante atoparase con "Mariscadoras", unha composición composta por unha trintena de figuras que representan este oficio tan propio das rías galegas. A exposición estará aberta ao público durante todo o mes de agosto. Ademais de poder gozar dela, os visitantes interesados poderán mercar algunha das pezas.
Publicado en CULTURA
O cantante Bertín Osborne inicia esta noite a súa nova xira “Crooner II” en Sanxenxo. Unha cita musical enmarcada no Ciclo de Concertos Q, e que onte á tarde se presentou nesta localidade das Rías Baixas, contando coa presenza, entre outros, da Directora de Turismo Nava Castro, e o célebre artista. Sanxenxo é o lugar do mundo escollido polo coñecido cantante Bertín Osborne, para inaugurar a súa nova xira, “Crooner 2 “. Faino tras recibir o Premio Q de Calidade Turística en recoñecemento á súa traxectoria e á súa defensa da calidade e da marca España. Unha constante que o converteu en embaixador desta Q. Tal e como destacou o alcalde de Sanxenxo, durante a presentación do Ciclo de Concertos Q que tivo lugar onte na localidade, e á que asistiron tamén a directora de Turismo, Nava Castro, e o presidente do ICTE Miguel Mirones. Concertos Q O alcalde da vila, Telmo Martín, agradeceu ó cantante que elixira Sanxenxo para dar comezo á súa xira. Miguel Mirones, presidente do Instituto de Calidade Turística Española, subliñou a relevancia da actividade e o papel do cantante Bertín Osborne levando o nome do país polo mundo adiante. O artista quixo subliñar durante a presentación o agarimo que lle ten á nosa terra, así como o orgullo que sinte cando viaxa por outros países representando a marca España. O show de Bertín Osborne comeza ás dez e media desta noite, un espectáculo onde interveñen máis de 20 músicos sobre o escenario, que interpretarán baladas de sempre, rancheras, e o seu último xénero, como Crooner, e unha Big Band de 15 músicos ó máis puro estilo jazz americano. A cita comeza ás nove e media na praza do mar de Sanxenxo e a entrada é gratuíto.
Publicado en SALNÉS - CALDAS
O concello de Vilagarcía quere impulsar as ideas dos emprendedores do seu municipio, e farao a través dos primeiros Premios Emprende VGA. Unha nova acción que busca fomentar o emprendemento e a creación de emprego. Esta mañá presentouse no concello. Posto en marcha polo concello de Vilagarcía co obxectivo de impulsar e premiar as iniciativas innovadoras e favorecer a visibilidade dos emprendedores, nacen os primeiros Premios Emprende VGA, que esta mañá se presentaron no concello. O concelleiro de Promoción Económica comezou o acto lembrando os datos que avalan á corporación no seu compromiso cos emprendedores. Un paso máis neste apoio ó emprendemento son estes primeiros premios ás iniciativas empresariais, que constarán de 3 categorías: Premio á Mellor iniciativa, Premio á actividade comercial máis innovadora, e Premio ó mellor proxecto relacionado co mar. Cada un dos premiados de cada categoría, conseguirán os seguintes premios. Uns premios de gran relevancia, porque tal e como dixo a Coordinadora de Proxectos do Coworking Dalle que Dalle, que colabora na iniciativa, o contar cun mentor á hora de emprender un negocio, é fundamental. O prazo de presentación de solicitudes remata o próximo 11 de agosto. O día 23 o xurado profesional fará pública a listaxe dos proxectos finalistas, e xa o 29 de agosto, tras unha presentación oral por parte dos finalistas, serán elixidos os 3 proxectos gañadores. O único requisito, ser emprendedor vilagarciá, cunha iniciativa recente ou a piques de poñerse en marcha.
Publicado en SALNÉS - CALDAS
POIO> Polémico pleno o de onte en Poio coa ausencia do PP e a protesta dos traballadores de Valoriza. a empresa adxudicataria do servizo de limpeza, que anunciaron no pleno unha folga de recollida do lixo a partir do día 16, tras romperse a negociación coa dirección da empresa. O pleno deste mércores en Poio estivo marcado pola polémica. Por unha banda, o grupo popular decidía non asistiron á sesión alegando que o concello, liderado polo nacionalista Luciano Sobral, se negara a facilitar ó PP os documentos recibidos por rexistro, polo que sospeitan que están a ocultar información, tal e como nos explicou o voceiro, Ángel Moldes. Moldes explicou que a decisión de non acudir é unha responsabilidade de cara ós veciños, xa que de asistir ó pleno cobrarían aínda que se levantasen ós dous minutos de comezar a sesión. Protestas fóra da casa consistorial, e protestas dentro. Ademais da ausencia dos populares, o pleno estivo marcado pola protesta dos traballadores de Valoriza, a empresa encargada da recollida do lixo e limpeza viaria de Poio. Empregados e representantes sindicais acudiron ó pleno con pancartas nas que reclamaban un convenio xusto. A estas alturas continúan rotas as conversas coa empresa e os representantes sindicais decidiron iniciar unha folga na limpeza que tal e como anunciaron onte comezará o próximo 16 de agosto se non se resolve o conflito. O principal punto de desacordo atópase en relación cunha paga extra, que estes traballadores sinalan que reciben todos os empregados da limpeza e que a eles négaselles.
Publicado en SALNÉS - CALDAS
Os doutores alivian a dor, e os paiasos o sufrimento. É a idea que nos transmitiu esta mañá no Hospital do Salnés Laura Mandarina, de Paiasos en Rebeldía. A piques de comezar o Festiclown en Vilagarcía, o concello quixo adiantar uns días a estrea para levar sorrios alí onde máis falta fan, na unidade de pediatría do Hospital. Humanizar os hospitais e crear sorrisos onde habitualmente non os hai. É a esencia da iniciativa que un ano máis a Obra Social La Caixa e o Concello de Vilagarcía levan á unidade de pediatría do Hospital do Salnés. O festiclown, a mostra internacional que se celebrará na capital arousá do 10 ó 15 de agosto, adiantouse uns días para achegarse ó centro hospitalario para traer a ilusión á mañá de rapaces como Xandre, de tes anos, e a súa familia. Os pais agradecidos… E ós pequenos, só con verlles a cara..a exp eriencia pagou a pena. A experta en transformación de emocións, nesta ocasión era Laura Mandarina, de Paiasos en Rebeldía. Unha agrupación que traballa en diferentes partes do mundo e que tamén estará presente no Festiclown. Para ela o máis importante á hora de traballar nun hospital, onde ten máis de dez anos de experiencia, é a improvisación e a empatía. Non consegue o mesmo que un doutor, pero o resultado, tamén é necesario Grazas á súa labor esta mañá a unidade de Pediatría do Salnés viviu unha mañá diferente, e os que non poidan asistir ó Festiclown nas rúas de Vilagarcía puideron presenciar este pequeno adianto, para algúns, o primeiro espectáculo de toda a súa curta vida .
Publicado en SALNÉS - CALDAS
A Xunta duplicará o servizo de transporte público en autobús de Vilanova ó Hospital do Salnés. É unha das medida do Novo Plan de Transporte Público de Galicia que entrará en vigor o próximo 8 de agosto e que esta mañá defendeu en Vilanova a conselleira desta área, Ethel Vázquez. Unha demanda histórica dos concellos da Mancomunidade do Salnés, e que a partir do 8 de agosto será unha realidade. A necesidade de mellorar as conexións entre os distintos concellos da comarca co Centro Hospitalario do Salnés, sobre todo, desde os municipios que peor comunicación tiñan, como O Grove, Cambados ou A Illa, tal e como sinalou o alcalde vilanovés e presidente en funcións da Mancomunidade, trala reunión coa Conselleira de Transporte, Ethel Vázquez, esta mañá. A nova liña O Grove- Hospital Do Salnés reforzará os servizos municipais existentes, con 5 novas viaxes diarias de ida e volta. A medida é un dos puntos que se inclúeno no Plan de transporte Público de Galicia, a resposta da Xunta para garantir os servizos públicos de autobuses, ante a renuncia de varias empresas ás liñas destes servizos. Un plan que segundo a conselleira duplicará o número de paradas en preto de 200 concellos. Un plan que entrará en vigor o 8 de agosto, non exento de polémica. Mañá terá lugar a Mesa Galega de Transporte na que se decidirá se a folga de autobuses continúa ou non paralizada. A patronal continúa asegurando que o plan trae consigo unhas concesións que serán deficientes e que traerán inestabilidade ó sector. A conselleira contestou esta mañá que o plan garantirá o servizo á cidadanía, e que en todo caso esta situación foi provocada polas propias empresas que agora protestan. Entre hoxe e mañá quedará adxudicados tódolos novos contratos deste Plan de Transporte Público. A conselleira de Infraestruturas asegurou que o goberno galego está a analizar a fórmula xurídica para poder atender a demanda da Mancomunidade do Salnés de xestionar as liñas de transporte da comarca.
Publicado en SALNÉS - CALDAS
Rock, country e reggae, son as tres propostas musicais que encherán os seráns dos venres de agosto en Cambados .Tralo remate do Albariño, que se celebrará a próxima semana, a vila quere recuperar a movida nocturna co programa Seráns de Troula que esta mañá se presentou no concello. Porque trala fin do Albariño, que terá lugar a próxima semana, en Cambados aínda queda moito agosto e moita troula. Por iso a concellería de Xuventude e a de Cultura, organizan en conxunto un programa que encherá de música a Cidade Europea do Viño os venres 11, 18 e 25 de agosto. Esta mañá presentouse no concello este proxecto, denominado Seráns de Troula . Para reverter esta situación ambas concellerías crearon estes serán de Troula, ós que lle deu forma Cristina Padín, a súa organizadora que esta mañá foi a encargada de dar conta dos grupos musicais que amenizarán os venres de agosto, a través do rock, o country e o reggae. A primeira cita o venres día 11. Os concertos que serán gratuítos, serán a partir das nove e media da noite na Praza de Alfredo Brañas ou na Rúa Real.
Publicado en SALNÉS - CALDAS
HomeMostrando artigos por etiqueta: Salnés Top of Page

Síguenos en facebook