• Facebook
  • Twitter
  • Rss
  • Plus

CANAL RÍAS BAIXAS
VILANOVA> Tras presentar a exposición en Pontevedra, o pedagogo italiano iniciou o seu periplo pola comarca de O Salnés. Francesco Tonucci visitou o colexio vilanovés Viñagrande de San Miguel de Deiro, un centro no que non ocultaron a súa admiración polo traballo deste experto. De feito xa aplican algunhas das súas ideas. O colexio Viñagrande de San Miguel de Deiro presumiu esta mañá de proxecto educativo. O centro estreou este ano novas propostas baseadas, en gran medida, nos postulados do pedagogo Francesco Tonucci. Hoxe, o italiano visitou a escola vilanovesa. Incorporar o exercicio físico nas primeiras horas lectivas, mesturar nenos de diferentes idades e crear contextos de aprendizaxe diferentes, son algunhas das propostas coas que traballan en Viñagrande. Para o pedagogo italiano, o profesorado do centro vilanovés vai polo bo camiño na aplicación destes novos xeitos de aprendizaxe. Cambios que deben dirixirse, sobre todo, aos alumnos máis débiles. A realización de programas de televisión ou de radio e a creación de revistas para facer público os traballos dos cativos, ou a aposta pola biblioteca como centro de expresión plásticas e doutras linguaxes, son algunhas das propostas de Tonucci que xa se aplican no día a día de Viñagrande.
Publicado en SALNÉS - CALDAS
SANXENXO> O concello de Sanxenxo, descontento coa xestión da Deputación de Pontevedra das obras da rúa Luis Rocafort. Esta mañá, o alcalde denunciaba que non recibira resposta á súa petición de facer 20 prazas de aparcadoiro en batería; unha solicitude que, ademais, trasladara a plataforma veciñal que se opoñía ao proxecto provincial. Gonzalo Pita insistiu en que el estará do lado dos veciños. Rompeuse a boa sintonía entre o concello de Sanxenxo e a Deputación de Pontevedra na reforma da avenida Luis Rocafort. Hai varias semanas, o alcalde trasladou ao organismo provincial a petición de facer 20 prazas de aparcadoiros en batería; solicitude que non tivo resposta. A proposta suporía a redución da beirarrúa de 6 a 4 metros no treito que transcorre entre o centro de saúde e o centro de Telefónica. Deste xeito, tamén se atendería á petición da plataforma veciñal que pedía máis aparcadoiros na zona, chegando ás 120 prazas. Tamén preocupa a dificultade que vehículos grandes, como autobuses, poden ter para entrar na rúa dende o paseo de Silgar. Por iso Pita pediu incorporar estes cambios, asegurou que o goberno local non vai consentir a paralización das obras, e recordou que as arcas municipais achegan o 30% do financiamento. Esta non é a única xestión da Deputación que non gusta ao goberno local. Tamén critican que case dous anos despois de facerse co executivo provincial, non haxa novas sobre o futuro da estrada de Dorrón. Por todo, o rexedor considera esgotada a vía diplomática. Pola súa banda, dende a Deputación de Pontevedra non quixeron facer declaracións.
Publicado en SALNÉS - CALDAS
CAMBADOS> Tres días despois da retirada da estatua de Manuel Fraga dos xardíns de Torrado, a decisión do goberno cambadés continúa a colear. Como era de agardar, a medida non gustou ao Partido Popular. Dende a formación defenderon a figura do expresidente da Xunta, destacando o seu apoio ao sector vitivinícola. Hai tres días que a estatua de Manuel Fraga non ocupa o lugar dos xardíns de Torrado no que fora instalada no 2012. Como era de agardar, a decisión do goberno de Cambados non gustou ao Partido Popular da vila. Para os populares, a intención dos viticultores non era destacar a faceta política de Manuel Fraga, senon o seu papel como defensor do sector vitivinícola da zona. Por iso, aseguran que botar man da Lei da Memoria Histórica para xustificar a retirada da escultura é un "sen sentido". Dende a formación aseguran que están a recoller o malestar de moitos veciños de Cambados e, segundo explicou Luis Aragunde, van estudar as posibles medidas a tomar.
Publicado en SALNÉS - CALDAS
VILAGARCÍA> Os veciños da Coca, en Vilagarcía, esixen melloras para o parque. A plataforma conseguiu recoller preto de 500 sinaturas contra o composteiro que o concello pretende instalar nesa zona. Unha oportunidade que aproveitaron para denunciar o abandono do entorno. Con case medio milleiro de sinaturas, os veciños do Parque da Coca oficializaron a súa oposición ao composteiro que o concello quere instalar na zona. Non gusta a ubicación, pero tampouco lles convence a xestión do concello. Critican que o goberno local non falou cos veciños para escoller a ubicación dos composteiros. As sinaturas xa están no concello dende o pasado venres, cando as presentaron por rexistro. Ademais, os veciños aproveitaron a oportunidade para reclamar máis melloras no Parque da Coca; un entorno rico pero que ven abandonado pola administración local. A limpeza de maleza nalgunhas das parcelas do entorno e a restauración dos muíños para uso público como valor etnográfico da Vilagarcía rural, son outras das peticións que recolleron os veciños no documento presentado no concello. Peticións que, a día de hoxe, seguen sen resposta.
Publicado en SALNÉS - CALDAS
PONTEVEDRA> O consello regulador da denominación de orixe rías Baixas inicia os preparativos para as eleccións dos novos vocais do seu pleno. Os comicios celebraranse o domingo 9 de xullo, trala convocatoria publicada pola Consellería do Medio Rural no Diario Oficial de Galicia. Os censos exporanse a partires do 3 de maio nas oficinas agrarias comarcais, concellos, sé do consello regulador e servizos centrais e xefaturas territoriais da Consellería do Medio Rural, para que os interesados poidan presentar alegacións ata o 12 de maio. Dende o 2 de xuño exporanse os censos definitivos. Do 22 de maio ao 2 de xuño poderán presentarse candidaturas. Finalizados estes prazos, o 29 iniciarase a campaña electoral, que se prolongará ata o 7 de xullo. Tralas votacións do día 9, o 11 a xunta electoral proclamará os vocais electos e, a partires do 17 de xullo, a consellería de medio rural terá que convocar aos novos vocais electos para tomar posesión da súa acta e escoller por maioría ás persoas que vaian ocupar os cargos de presidente e vicepresidente. Nas eleccións, as segundas que se organizan dende este Consello Regulador, estarán implicadas 183 adegas e 5.500 viticultores.
Publicado en PONTEVEDRA
VILANOVA> A asociación Solidaridade Galega co Pobo Saharaui traballa a contrarreloxo para conseguir os fondos que lles permitan sufragar os billetes de avión para manter o seu programa "Vacacións en Paz". Con este obxectivo, o domingo preparan unha andaina solidaria que percorrerá diferentes puntos de Vilanova. Os veciños de O Salnés teñen este domingo unha cita coa solidaridade. A asociación Solidariedade Galega co Pobo Saharaui está a organizar unha andaina para recadar os fondos que lles permitan manter en marcha o seu programa "Vacacións en Paz". A saída será ás 10 da mañá da praza do concello, cun trazado de 13 quilómetros apto para todos os públicos. O ano pasado, conseguiron convocar ao redor de 300 persoas; cifra que agardan mellorar nesta edición. O custo da inscrición é de 5 euros e poderá formalizarse por adiantado ou o mesmo día da andaina. Os cartos destinaranse ao pago dos billetes de avión que hai que aboar antes do 30 deste mes. A parte da andaina, Sogaps prepara un festival que se celebrará no Pavillón de Vilanova o propio día 30.
Publicado en SALNÉS - CALDAS
VILAGARCÍA> Xa coñecemos o nome do primeiro precandidato a presidir o Partido Popular de Vilagarcía. Esta mañá, Alfonso González Gallego, responsable comercial da Autoridade Portuaria, daba un paso adiante para substituír a Tomás Fole. A falta de 72 horas para pechar o prazo, é a única precandidatura presentada. A 72 horas de que se peche o prazo para presentar as precandidaturas, o Partido Popular xa ten un posible substituto para Tomás Fole á fronte da formación en Vilagarcía. Esta mañá, Alfonso González decidíase a dar un paso adiante. González Gallego leva 15 anos como responsable do departamento comercial e de márketing da Autoridade Portuaria, e tan só 8 meses como militante do PP. Tras esta experiencia, o xa precandidato a presidir aos populares vilagarciáns aposta por traballar para unir á formación. Sobre a posibilidade de optar á alcaldía, asegurou que aínda é cedo para plantexalo.
Publicado en SALNÉS - CALDAS
CAMBADOS> O concello de Cambados actúa para mellorar a seguridade viaria na avenida de Vilariño. En concreto, o goberno local vén de prohibir o cambio de sentido no cruce da rúa O Castro e o vial principal. Unha medida coa que buscan evitar os atascos en horas punta. O concello de Cambados vén de prohibir o cambio de sentido no cruce de O Castro con Vilariño. Dende hai uns días, os condutores que se incorporen á avenida e queiran dirixirse ao centro cambadés terán que dar a volta na rotonda. Segundo explicou José Ramón Abal, ese é un dos puntos negros da rede viaria cambadesa. Por iso, nas horas punta está previsto que axentes da policía local se despracen ata ese cruce para explicar os cambios aos condutores. Esta non é a única intervención na zona. Xa comezaron as obras para ampliar o cruce da PO-300 coa rúa Cruceiro; traballos que foron posibles grazas a un acordo coa propietaria do terreo, e que se realizan con cargo ao Plan Concellos 2016 da Deputación. As obras foron adxudicadas por 16 mil euros e teñen un prazo de execución de tres meses.
Publicado en SALNÉS - CALDAS
CAMBADOS> A estatua de Manuel Fraga xa non está nos xardíns de Torrado en Cambados. O concello retirou a polémica escultura do expresidente galego que fora colocada no 2012 tralo seu falecemento. Segundo explicou o nacionalista Víctor Caamaño, a súa retirada responde a unha decisión política. Esta foi a imaxe do día en Cambados. Cara o mediodía, o goberno local retiraba a estatua de Manuel Fraga, instalada nos xardíns de Torrado hai cinco anos. Xa no 2012, a colocación da escultura estivo rodeada de polémica. O concello, gobernado polo PP de Luis Aragunde, quixo desvencellarse da súa instalación, e asegurou que a iniciativa partira dun grupo de viticultores. Segundo a versión oficial, coa estatua, realizada polo escultor Lucas Míguez, buscábase agradecer a implicación de Fraga co sector vitivinícola e a Festa do Albariño de Cambados. Agora a decisión de retirala foi iniciativa da concellería de Cultura, dirixida polo nacionalista Víctor Caamaño. O edil definiu a escultura como un recordo "negativo-franquista", postura que compartiron a alcaldesa Fátima Abal e os concelleiros de Somos Cambados. Retirada xa dos xardíns de Torrado, a escultura de Manuel Fraga trasladarase ao almacén do seu autor. No seu lugar non está prevista a instalación de ningún outro elemento; unicamente arranxarase a área do xardín que ocupou nos últimos cinco anos.
Publicado en SALNÉS - CALDAS
CAMBADOS> O establecemento Kebab, situado na rúa Os Pios de Cambados, abriu durante toda a Semana Santa, eludindo a notificación de peche que lle fixo chegar o pasado día 12 o concello cambadés, en cumprimento dunha sentenza xudicial. Os veciños afectados, polos malos cheiros e os ruídos do local, continúan sen poder durmir polas noites. Hoxe acompañámolos a presentar un escrito de protesta no consistorio. Hai unhas semanas comprobabamos en primeira persoa, como este Kebab da rúa Os Pios de Cambados fai a vida imposible a vida destes veciños. Ruídos a altas horas da madrugada, e cheiros que entran por calquera burato dos seus fogares, debido a un problema na condución do aire. O pasado día 12 de abril, o concello de Cambados notificou ó xerente do local hostaleiro a orde de peche, mentres non se solucionan estes problemas. A orde cumpre unha sentenza do Xulgado Contencioso Administrativo número 1 de Pontevedra. Tras continuar sufrindo durante toda a Semana Santa, e onte mesmo, esta mañá acompañamos ós veciños afectados a presentar un escrito no concello cambadés. Esta mañá puidemos falar tamén co concelleiro de economía e comercio, que asegura que o concello non pode facer máis que acatar as sentenzas xudiciais, pero non facerse responsable de que o encargado do local non cumpra coa lei. O concelleiro explicou ademais que os veciños presentaron dúas demandas diferentes, e que nunha delas aínda non hai resolución. Os veciños contestan que os dous procesos son independientes, e que coa sentenza na man do Número 1 o local ten que permanecer pechado. Consideran tamén que o concello debería terse asegurado de que o Kebab cumpre coa notificación de peche que lle fixeron chegar. Coa polémica sobre a mesa, e á espera da cómo evolucionen os feitos, os malos fumes continúan nesta rúa dos Pios cambadesa.
Publicado en SALNÉS - CALDAS
Último día das celebracións da Semana Santa e aínda festivo nalgúns concellos das Rías Baixas, como é o caso de Meis. Esta mañá nos arredores do Mosteiro da Armenteira, milleiros de fieis e visitantes quixeron unirse á celebración da súa tradicional Romaría das Cabezas. Unha festividade na que a relixión e a troula comparten cartel. Dín que quita os males de cabeza…e por iso, por se acaso, hai que vir cada luns de Pascua a esta Romaría da Armenteira, en Meis. A tradicional xornada comeza a primeira hora da mañá, cando veciños e foráneos empreden a camiñata para chegar ata o Mosteiro da de Santa María da Armenteira, na ladeira do Monte Castrove. Unha peregrinación na que participan veciños de tódalas idades, representantes políticos, devotos ou calquera visitante con ganas de coñecer unha das romarías máis multitudinarias do Salnés. Seguindo a Ruta da Pedra e da Auga, chegamos ó destino, convertido nun fervedoiro de xente onde atopamos romeiros chegados de todas partes do mundo. E é que motivos para vir á Romaría das Cabeza, hai dabondo. Trala misa solemne, chega o momento máis emotivo, a procesión na honra á Virxe. Ogallá cumpra as peticións de cada fiel a Nosa Señora. Pero fieis tamén os hai cada ano, ós postos de polbo e churrasco que rodean sempre o mosteiro. Xa escoitaron, unha cousa é velo pola televisión, e outra vivilo en persoa. Téñano en conta para o próximo luns de pascua…Romaría das Cabezas, na Armenteira.
Publicado en SALNÉS - CALDAS
VILAGARCIA> Arranca a segunda fase de humanización do centro de Vilagarcía. Trala peonalización das rúas que dan acceso á Praza de Galicia, agora vén de convocarse a adxudicación para o proxecto que faga o mesmo coa Praza da Independencia. Un centro de Vilagarcía peonil é o obxectivo do goberno socialista deste concello, que continúa co seu plan de humanización .Tras encamiñar a primeira fase, coas obras de peonalización da Praza de Galicia, a redacción do proxecto e execución da humanización da Praza da INdepedencia xa está en marcha. Cun presuposto de 20.000 euros, a contratación realizaráse polo sistema de “invitación” ó tratarse dunha obra menor. Durante as obras, trataráse tamén de arranxar a propia praza, mellorar a súa imaxe e limpar a fonte. Pero os arquitectos que finalmente se fagan co proxecto, terán que ter en conta unha serie de directrices. Aínda que estas obras peonalización adoitan acarrexar defensores e detractores, esta mañá comprobamos que a gran maioría dos vilagarciáns que pasaron por aquí, teñen claro o resultado positivo que estes cambio supuxo noutras zonas da vila. Desde o concello calculan, que se o proceso continúa sen altercados, e os fondos europeos cos que se financiará chegan en tempo, agardan estar comezando as obras a comezos do próximo ano.
Publicado en SALNÉS - CALDAS
Páxina 1 de 72
HomeDEPORTESMostrando artigos por etiqueta: Salnés Top of Page

Síguenos en facebook