• Facebook
  • Twitter
  • Rss
  • Plus

A Xunta forma os 'Líderes de Futuro'

Mar 02 Escrito por 
GALICIA> Dende o pasado 26 de febreiro, corenta e cinco mozos e mozas galegos de entre 18 e 30 anos teñen máis papeletas para converterse nos líderes de futuro. Son os escollidos que están a participar no novo programa da Xunta de Galicia que, baixo este nome, busca fomentar habilidades e capacidades máis aló do eido académico.
  Líderes de Futuro é unha nova aposta da Consellería de Política Social. Estréase este ano cun programa innovador e único, que mestura a formación teórica coa práctica, con seminarios, obradoiros e, incluso, actividades ao aire libre para pór a proba as súas habilidades persoais e directivas. Diferenciarse para triunfar. Esta é a clave. Nun momento de alta competitividade no mercado laboral, as empresas buscan algo máis que a formación nos seus candidatos. Tamén nos ámbitos social e cultural. E aquí é onde entran o tipo de habilidades que se fomentan neste programa da Consellería de Política Social, a través da Dirección Xeral de Xuventude, Participación e Voluntariado. Esta é a primeira edición, pero Líderes de Futuro nace con vocación de continuidade, no marco da Estratexia de Xuventude posta en marcha pola Xunta. Unha estratexia transversal, na que participan todas as consellerías, para organizar actividades que afonden no benestar da mocidade. Todo o programa ‘Líderes de futuro’ conta con mentores e relatores de primeira liña. Eles serán os encargados de transmitir aos mozos e mozas as claves para chegar a ser un líder, e orientalos no seu camiño.5 O programa estrutúrase en dúas fases. A primeira delas prolóngase ata o 30 de marzo, e inclúe o seminario “Liderar na xuventude. Motivación para o éxito” e os obradoiros “Sacar o máximo partido do meu estilo de comunicación”, “A xestión de emocións con intelixencia” e “A organización: sacando o máximo partido dos meus colaboradores e de min mesmo”. Tamén as actividades de outdoor training, a escoller entre karts, paintball ou golf. Ese traballo individualizado é o que se realizará na segunda fase do programa. Só 25 dos participantes poderán acceder, e contar con mentores que os acompañarán na consecución dos seus obxectivos particulares, axudándolles a planificar os seus pasos. Estas sesións de coaching personalizado celebraranse entre o 8 de abril e o 6 de maio. Recordemos que os participantes son mozos e mozas galegos de entre 18 e 30 anos. Máis aló destes puntos en común, os seus perfís son moi variados. Precisamente, as diferenzas nas súas procedencias é unha mostra clara do carácter transversal das habilidades e competencias que buscan adquirir no programa. Onde si coinciden é nos motivos que os levaron a apuntarse a este Líderes de Futuro. Potenciar as súas habilidades comunicativas e abrirse portas no mercado laboral, foron os principais incentivos que os animaron a inscribirse. Eles son os afortunados que estrean este ambicioso ‘Líderes de Futuro’ e que axudarán a medir o éxito desta nova aposta da Xunta de Galicia e da Consellería de Política Social a través da Dirección Xeral de Xuventude.
 
Publicado en GALICIA

Artigos relacionados (por etiqueta)

  • A Xunta aposta polo emprendemento no sector forestal
    PONTEVEDRA> A Xunta colabora coa Cámara de Comercio de Pontevedra, Vigo, Vilagarcía e a Zona Franca para impulsar o emprendemento no sector forestal. O conselleiros de Economía, Francisco Conde estivo, este venres, en Pontevedra, onde sinalou a importancia do sector forestal na comunidade. O sector forestal na nosa comunidade é un dos máis importantes. Conscientes de esta realidade dende a Cámara de Comercio de Pontevedra, Vigo, Vilagarcía, Zona Franca e coa colaboración da Xunta, van a afondar na posta en valor do emprendemento no sector.
  • Aposta decidida pola náutica na Eurorrexión Galicia-Norte de Portugal
    PONTEVEDRA> A aposta por potenciar Galicia como destino náutico é decidida. Esta mañá en Pontevedra presentouse o proxecto Ecodestin, que busca potenciar este sector na Eurorrexión Galicia-Norte de Portugal. A iniciativa, financiada con fondos europeos, conta con dous millóns de orzamento, e levarase en principio a dezasete portos galegos. Potenciar Galicia como destino náutico único e educativo é o obxectivo do Proxecto Ecodestin. A iniciativa busca integrar o patrimonio na oferta náutica da Eurorrexión Galicia-Norte de Portugal. O plan conta cun investimento de máis de 2 millóns de euros, e desenvolverase dende o 2017 ao 2019. Combarro, Sanxenxo, Cabo da Cruz, Vilagarcía de Arousa ou Cambados son algúns dos portos galegos sobre os que actuará este plan, aos que se suman oito portugueses. A intención é atraer visitantes nacionais e, sobre todo, internacionais, facendo especial fincapé na promoción en Francia, Alemaña, Países Escandinavos e Norte América. Ofrecendo un produto completo e atractivo. Ademais deste proxecto, nas rías galegas xa funcionan os minicruceiros, os dez ferries previstos para o mes de setembro e as excursións en veleiro. Todo dando forma a unha oferta náutica que agarda estar a pleno rendemento o vindeiro ano.
  • O centro de saúde pechará oito tardes en setembro
    CAMBADOS> O concello de Cambados denuncia un novo recorte en materia sanitaria no municipio. Durante o mes de setembro, o centro de saúde pechará oito tardes. Dende a concellería de Sanidade, apuntan á falta de substitucións do persoal como motivo, e denuncian a intención privatizadora da Xunta de Galicia. No mes de setembro, os cambadeses verán reducido o horario do seu centro de saúde. Segundo anunciou o SERGAS, o ambulatorio pechará oito tardes; decisión que, segundo apuntan dende o concello, dificulta o acceso á sanidade de moitos veciños. Cordal non ocultou o seu malestar. Para el, esta medida é froito do afán privatizador da Xunta de Galicia respecto da sanidade pública, e un recorte máis nos servizos que padecen en Cambados. Tampouco gusta que dende o goberno autonómico non se notificara ao concello esta medida. Unha mostra máis, asegura, da falta de diálogo do executivo de Alberto Núñez Feijóo. Dende o concello cambadés xa amosaron en varias ocasións a súa oposición á política sanitaria da Xunta. A máis recente, a moción que apoiaron a semana pasada solicitando a retirada do anteproxecto de Lei de Saúde, que convertirá a área sanitaria de O Salnés nun distrito da de Pontevedra.
  • O persoal do Hospital do Salnés mantén o pulso á Lei de Saúde
    VILAGARCÍA> O persoal do Hospital do Salnés mantén a súa oposición ao anteproxecto da Lei de Saúde da Xunta. Como anunciaran, esta mañá celebrouse diante do centro a primeira das concentracións semanais que celebrarán para demostrar o seu rexeitamento da norma. A mobilización repetiuse nas outras tres áreas afectadas. O Hospital do Salnés acolleu esta mañá a primeira concentración semanal contra o anteproxecto da Lei de Saúde da Xunta. A Xunta de Persoal do centro expresou a súa oposición á nova norma. A concentración de O Salnés tivo a súa réplica nas outras tres áreas que tamén, segundo explican dende a Xunta de Persoal, desaparecerán coa reforma: O Barco, Burela e Monforte. Con esta mobilización, o que buscan é a retirada do anteproxecto que conta con máis de 1.500 alegacións. As mobilizacións repetiranse cada semana, pero a intención das áreas afectadas á preparar unha manifestación a gran escala para demostrar que non están sós nas súas reclamacións. Non hai data fixada, pero calculan que será a finais de setembro. Ademais de explicar o contido desta reforma, a intención da xunta de persoal é reactivar a Plataforma en Defensa da Sanidade Pública do Salnés. Un obxectivo para o que contan con algunhas formacións políticas, sindicatos e colectivos sociais. Por iso celebrarán reunións nos diferentes concellos da área sanitaria de O Salnés, empezando o vindeiro martes en Vilagarcía. Tamén presentarán mocións nos plenos dos concellos para buscar o apoio das corporacións.
  • A xerencia defende que a nova Lei de Saúde blinda os hospitais comarcais
    VILAGARCÍA> A Lei de Saúde de Galicia non vai prexudicar aos pacientes nin eliminará os hospitais comarcais. Así o defenden dende a xerencia da área de xestión integrada de Pontevedra-O Salnés. Segundo a súa directora asistencial, os pacientes non van notar ningún cambio, xa que as modificacións son meramente organizativas. Tamén asegura que, ao contrario do que se cre, blinda os centros comarcais, como o Hospital do Salnés. A xerencia da área de xestión integrada Pontevedra-Salnés defende o polémico anteproxecto de Lei de Saúde de Galicia. Aseguran que con esta modificación da lei de 2008 blindaranse os hospitais comarcais. Insisten en que os máis beneficiados serán os pacientes, que non notarán importantes cambios na súa atención sanitaria. Segundo Fernández Arruti, os cambios serán unicamente organizativos. Así, de once áreas sanitarias pasarase a ter sete en toda Galicia, e crearanse 14 distritos en torno aos 14 hospitais públicos. Tampouco, asegura, haberá cambios nas contratacións. Deste xeito, dende a EOXI saen ao paso da polémica xerada en torno a este cambio na norma, que ten a oposición da xunta de persoal do Hospital do Salnés e de varios alcaldes da comarca. Estas protestas xa atoparon apoio nos outros centros afectados, que coordinarán mobilizacións para frear o anteproxecto.
  • A xunta de persoal busca o apoio dos alcaldes na defensa do Hospital do Salnés
    VILAGARCÍA> A xunta de persoal do Hospital do Salnés busca o apoio dos concellos para defender a área sanitaria. Esta mañá, mantiveron un encontro cos representantes dos concellos de Vilagarcía, Cambados, A Illa e Ribadumia, para trazar unha fronte común contra o anteproxecto de lei sa Xunta. Consideran que dá un paso máis na privatización da sanidade pública, polo que responderán coa mobilización social. A xunta de persoal do Hospital do Salnés buscou alianza cos alcaldes da área sanitaria para defender o centro do anteproxecto de lei que quere levar adiante a Xunta. Unha proposta que, aseguran, é un paso máis na privatización da sanidade pública. A súa postura foi defendida tamén polos alcaldes. Ao encontro acudiron os rexedores de Vilagarcía, Cambados e A Illa de Arousa, ademais dunha edil do concello de Ribadumia. Catoira non puido asistir por problemas de axenda, o mesmo motivo co que desculpou a súa ausencia o alcalde de Vilanova. Un dos primeiros pasos, será elaborar unha moción conxunta para levar aos plenos de todos os concellos que forman parte da área sanitaria de O Salnés. Tamén apostan pola mobilización social. De feito, a xunta de persoal pon a disposición dos que o desexen un texto tipo para presentar suxestións. O vindeiro xoves a xunta de persoal manterá un encontro con concelleiros doutros grupos políticos e cos sindicatos. Tamén buscarán unha folla de ruta común coas áreas sanitarias de Monforte, Burela e O Barco, as outras afectadas polo anteproxecto.
HomeGaliciaA Xunta forma os 'Líderes de Futuro' Top of Page

Síguenos en facebook