BARBANZA> O empresario Ramiro Carregal vén de doar trinta mil euros a Oncomet. Estes fondos destinaranse os distintos proxectos de investigación para identificar marcadores tumorais.
O fundador do grupo Frinsa segue a contribuír á investigación contra o cancro. Á súa colaboración con diversas entidades e o patrocinio dun premio oncolóxico súmase agora a doazón de trinta mil euros que vén de realizar a ONCOMET. O Grupo de Oncoloxía Médica Traslacional de Investigación Sanitaria de Santiago distribuirá os recursos entre os proxectos que desenvolven para identificar marcadores tumorais que melloren o curso clínico dos pacientes.
Esta doazón nace con vocación de continuidade. Así o manifestou o propio Ramiro Carregal na súa visita ás instalacións de Oncomet acomapñado pola xerente do Complexo Hospitalario Universitario de Santiago, Eloína Núñez, e o xefe de oncoloxía e director do gripo, Rafael López. Este último quixo agradecer a xenerosidade e implicación do empresario con esta doazón que permitirá reforzar a investigación oncolóxica como facotr esencial para frear a progresión da enfermidade e mellorar a calidade de vida dos pacientes.
Cómpre lembrar que hai dous anos Ramiro Carregal foi un dos principais colaboradores da campaña de micromecenado desenvolvida por ONCOMET para o estudo de biopsia líquida que tan bos resultados está a dar entre a comunidade médica.
