• Facebook
  • Twitter
  • Rss
  • Plus
BOIRO> O alcalde, Xoán Xosé Dieste, confirmou a existencia dunha partida reservada de 1’7 millóns de euros nos presupostos autonómicos do ano que vén para iniciar xa a súa construción. Sen dúbida tratábase dunha das maiores demandas dos diferentes gobernos municipais que durante estes anos pasaron pola alcaldía boirense, que por unha ou outra razón nunca chegaba a executarse. Segundo o alcalde, Xoán Xosé Dieste, a actuación verase finalmente cumprida o ano que vén grazas á aportación do Goberno Autonómico. Nos presupostos de 2018 inclúese unha partida inicial de 1,7 de millóns dos preto de sete nos que está presupostado o proxecto. Dieste destacou a importancia desta obra, dado o peso do sector bateeiro na localidade, e a importancia das mesmas de cara á reordenación dos espazos portuarios. A actuación sumarase a outras importantes melloras xa realizadas, ou que están a piques de rematar, como é o caso da instalación dos pantaláns para as embarcacións marisqueiras no que se investiron uns setecentos mil euros ou obras de conservación e mantemento na explanada portuaria por valor de máis de 40 mil euros.
BOIRO> O incendio afectou a varias zonas da parroquia de Cures. Durante a tarde-noite chegou a activarse a situación dous debido á proximidade das lapas ás vivendas. Un dos primeiros focos producíase na zona da Figueira. Ó mediodía, a columna de fume e lapas, avanzaba a velocidade de vertixe pola serra do Barbanza, axudada polas altas temperaturas e a forza do aire. Os medios terrestres apenas podían facer nada nesa zona de difícil acceso, e os aéreos, tampouco, debido ás condicións de vento existente. Ás nove da noite a situación empeorou. Nese tempo e segundo as primeiras estimacións de Medio Rural levaban ardidas xa máis de noventa hectáreas. Xa era, sen dúbida, o maior incendio dos que se levan rexistrado na comarca no que vai de ano. O lume estaba totalmente incontrolado e a situación facíase, cada vez, máis complicada xa que as lapas aproximábanse a varios núcleos de vivendas como é o caso de Balteiro e Lidón. Foi nese momento, entrada xa a noite cando se decretou o nivel de alerta dous debido á proximidade do lume a casa. Para os veciños deste último núcleo boirense foron momentos de gran tensión e medo, xa que as lapas avanzaban cara as súas casas. A pesar do medo vivido, non houbo que lamentar danos persoais, e tampouco tiveron que desaloxar as súas vivendas, grazas ó traballo dos equipos de emerxencias, que pasaron toda a noite na zona. O incendio de Cures non foi o único que se rexistraba esta pasada fin de semana no Barbanza. En Ribeira producíanse tamén varios lumes, aínda que a menor escala, que afectaron á zona de salmón, en Oleiros, e tamén a Palmeira, obrigando a mobilizar a estas dúas zonas a varios equipos de extinción.
Luns, 16 Outubro 2017 19:35

O Arousa lévase ó derbi ante o Boiro

BOIRO> Os vilagarciáns impúñanse ó Boiro en Barraña por cero goles a dous. Os tantos dos de Jorge Otero foron obra de Yerai e Javi Pazos. Cunha ampla presenza de afeccionados nas bancadas do municipal de Barraña, onte domingo disputouse o derbi comarcal entre o Boiro e o Arousa, que rematou co resultado final de cero a dous. Aínda así, e a pesar da diferenza no marcador, resultou un partido vibrante, no que os boirenses non foron inferiores ó seu rival. No inicio os de Jorge Otero sairon máis enchufados ó partido, levando o dominio no xogo. Foi nestes primeiros minutos de xogo cando se producía ademais a nota tráxica, coa lesión de Taboada, despois de recibir un testarazo de Sidibé na disputa dun balón aéreo. O xogador boirense tivo que abandonar o partido e foi trasladado a un centro hospitalario onde en observacións pasou a noite, aínda que á mañá xa foi dado de alta. O lance obrigou a suspender o choque uns minutos. O parón favoreceu ó Boiro que a partir de aí iniciou o seu dominio. A pouco para o remate da primeira parte producíase tamén unha das xogadas claves, que puido cambiar o signo do partido. O brasileiro Igor caía dentro da área tras un choque, aínda que o colexiado non interpretou nada. A xogada foi moi protestada polos locais e tamén na bancada. Eran os mellores momentos do Boiro. Co resultado de cero a cero chegaríase ó descanso. Xa na segunda parte máis do mesmo. Os dous equipos intentaban facerse co dominio do xogo pero sen apenas perigo na área rival. A falta de quince minutos para o final do partido, o Arousa conseguiría adiantarse. Unha xogada por banda de Suso, Javi Pazos e Yerai, acabou co balón nos pés deste último que de tiro cruzado enviaba o balón ó fondo das mallas. Era o cero a un. O tanto deixou noqueado ó Boiro que tres minutos máis tarde vería de novo perforada a súa portería. Esta vez Javi Pazos, que recibía só no segundo pau, enviaba o balón a dentro da portería. Sen tempo para a recuperación, o Boiro vía como se lle escapaba o partido. Os tres puntos sitúan ó Arousa na novena praza con catorce puntos, os mesmos que ten o Boiro, que agora se ve superado polos vilagarciáns na clasificación. Na próxima xornada, o Arousa recibirá na Lomba ó Barbadás, mentres que o Boiro enfrontarase ó Alondras.
BOIRO> A obra, que será executada en dúas fases, ascende a uns 142 mil euros, que irán con cargo ó remanente de tesourería do pasado exercicio 2016. Trátase dunha das rúas do casco urbano boirense máis degradadas, e que a día de hoxe presenta un peor estado, de aí que o executivo decidira realizar unha actuación importante que supoña a renovación non só estética, senón tamén de mellora de servizos, co separativo de auga e saneamento e a instalación de novas canalizacións. A reforma virá a poñer fin definitivo tamén ós os fallos existentes na rede de sumidoiros e ás continuas roturas nas tubaxes da rede de abastecemento de auga. A actuación enmárcase no plan deseñado polo Concello de cara a ir humanizando, na medida do posible, o casco urbano, como se fixo anteriormente coas rúas Norberto Pizjuan e Pablo Iglesias, na rúa Bao, na Estatuto de Galicia ou na Fernández Mato entre outras. O inicio das obras será inmediato, xa que a actuación deberá estar rematada a finais deste mesmo ano.
BOIRO> Os nacionalistas solicitaranlle á Xunta a dotación de pasos de peóns e a instalación de máis elementos de seguridade na zona. Facéndose eco dunha solicitude formulada xa polo grupo municipal, que mesmo resultou aprobada por unanimidade hai varios meses no pleno, o BNG levará ó Parlamento os problemas de seguridade viaria na zona de Vilariño. Para o BNG a obra está incompleta, polo que reclamarán que se corrixan as eivas detectadas, antes de que se produza unha desgraza. Dende o BNG denuncian que, en xeral, nas estradas autonómicas con este tipo de actuacións, incluídas no denominado Plan de Sendas, non se están a resolver as medidas de seguridade para as persoas, polo que piden a instalación de pasos de peóns seguros, elevados, ben iluminados e en ocasións regulados con semáforos, para evitar posibles accidentes.
BOIRO> O proxecto deseñado polo executivo boirense contará cun investimento de máis de 182 mil euros. Despois de numerosos atrancos que ó longo destes últimos anos impediron levalo a cabo, o executivo boirense impulsará a terceira fase do proxecto de recuperación e rexeneración ambiental no río Coroño. A actuación é unha vella demanda dos veciños da zona, ó tratarse dun espazo degradado onde existen varios puntos de vertido que agora se verán erradicados definitivamente. O proxecto, que conta cun orzamento duns 182 mil euros, podería estar xa rematado antes de finais da presente lexislatura. Con este proxecto o executivo boirense trata de revalorizar esta zona privilexiada, de gran beleza turística e medioambiental, na que se inclúen un parque infantil, un parque biosaudable e un parque multiaventura para nenos.
BOIRO> A actuación, cun orzamento superior ós 200 mil euros, será realizada con cargo ó remanente de tesourería do pasado exercicio 2016. Tratábase dun dos compromisos que o Partido Popular levaba no seu programa electoral para a presente lexislatura, e que segundo o alcalde, Xoán Xosé Dieste, será realizado a metade de mandato. Con estas afirmacións, o rexedor boirense dá réplica ás críticas formuladas nos últimos meses polos grupos da oposición que viñan demandando a realización desta obra. A actuación, cun presuposto próximo ós 200 mil euros, virá a solucionar os problemas de abastecemento de auga a varias zonas da parroquia de Bealo, especialmente na tempada estival.
BOIRO> Segundo o alcalde a boa xestión levada a cabo nestes anos posibilitou reducir considerablemente a débeda e mellorar tamén o pago a provedores. No último pleno o equipo de goberno deu conta da liquidación do pasado exercicio 2016. O resultado orzamentario a final de ano deu novamente un resultado positivo, superando o millón de euros. Segundo o alcalde, Xoán Xosé Dieste, trátase do sexto ano consecutivo no que se acada remanente positivo, aforro neto positivo e superavit. Onde van segundo el aqueles anos nos que o Concello tiña unha débeda que se superaba os 20 millóns de euros. Isto ademais conseguiuse sen incumprir un dos seus compromisos cando chegou á alcaldía. Non subir ningún imposto nin taxa municipal nestes oito anos. Grazas ó remanente positivo do ano pasado, máis dun millón de euros, o Concello poderá emprender importantes actuacións, como é o caso da recuperación ambiental do estuario do río Coroño_na súa terceira fase, a urbanización da rúa Francisco del Río ou a mellora do abastecemento de auga á parroquia de Bealo.
BOIRO> A Garda Civil localizou unhas once plantas de marihuana nunha finca da súa propiedade no lugar de Vistaverde. No marco da denominada operación ‘Vistaverde’, axentes da Garda Civil de Boiro procederon á detención dun veciño da localidade, con iniciais J.L.O.I., de 40 anos coma presunto autor dun delito de cultivo e elaboración de droga. As investigacións realizadas deron como resultado o comiso dunhas once plantas de marihuana que o prendido cultivaba nunha finca da súa propiedade situada no lugar de Vistaverde, en Escarabote. No operativo tamén se lle incautou dunha caixa que contiña ó redor de cincocentos gramos de brotes desta planta. Segundo informaron fontes do propio Instituto Armado o valor da marihuana incautada podería acadar os 6.200 euros. Os feitos xa foron postos a disposición do Xulgado Número 1 de Ribeira que é o que instrúe as dilixencias.
BOIRO> A solicitude dos nacionalistas prodúcese despois do vencemento do contrato coa empresa encargada do servizo e antes de que se saque novamente a licitación. Atendendo ás demandas dos propios usuarios das instalacións que dende hai tempo veñen manifestando as súas queixas polo mal funcionamento da piscina, o BNG solicitará no vindeiro pleno que o Concello asuma a xestión directa do complexo deportivo da Cachada. Para os nacionalistas esta sería a mellor maneira de garantir a calidade do servizo á veciñanza, xa que as empresas privadas só pensan no seu beneficio económico. Fano precisamente agora unha vez concluído o contrato coa empresa e cando o equipo de goberno ten previsto sacar a concurso unha nova licitación. Dende a formación frentista sinalan que as críticas polo mal funcionamento das instalacións non van contra o seu persoal, que si cumpre co seu cometido, que mesmo coa municipalización do servizo vería mellorado tamén as súas condicións de traballo.
BOIRO> A protesta serviu tamén para demandar a ampliación de horas e recursos de Pedagoxía Terapéutica e Audición e Linguaxe. Dúas eran as principais demandas que mobilizaron á comunidade educativa do CEIP Santa Baia de Boiro. Por unha banda a reclamación á consellería de Educación da renovación dos libros de texto de terceiro e quinto de primaria. Dende a ANPA apuntan a que os existentes atópanse xa moi deteriorados para o seu uso e os seus contidos están tamén obsoletos. a situación afecta a uns 120 escolares matriculados nestes dous cursos, que a día de hoxe non dispoñen de libros. A outra das solicitudes da Asociación de Nais e Pais de Alumnos do Santa Saia é a necesidade de ampliar as horas de e recursos de Pedagoxía Terapéutica e Audición e Linguaxe. Os tres educadores e o logopeda dos que dispón actualmente o colexio parécenlles insuficientes para atender ós 47 nenos matriculados que precisan desta atención especial, dos cales 8 son graves. Dende a ANPA apuntan a que seguirán coas súas reivindicacións ata que sexan atendidas por Educación, ó consideralas xustas. O alcalde, Xoán Xosé Dieste, mantivo esta mañá unha reunnión en Coruña na delegación de Educación para tratar de mediar e buscar unha solución a este asunto.
BOIRO> A actividade, organizada polo Concello, prevé a realización dunha diagnose persoal e individualizada a cada participante. Boiro conta unha nova actividade física que o Concello porá en marcha durante este mes de setembro da man da empresa EcoSport. Trátase do programa ‘Boiro Actívate’ e estará dirixido en principio a persoas maiores ou xubiladas con algún tipo de disfunción física causada por enfermidades de longa duración ou crónicas. Antes do inicio da actividade a cada participante seralle realizada unha diagnose persoal e individualizada que determine o tipo de exercicio que mellor lle convén para a súa saúde. Dende o Concello incidiuse na importancia desta iniciativa de cara a procurar unha mellor calidade de vida dos seus veciños, principalmente das persoas de máis idade. Os interesados en formar parte da iniciativa poderán inscribirse ata o próximo luns, 18 de setembro, chamando ó teléfono 981-972243. O número de prazas dispoñibles é de 20.
Páxina 1 de 67
HomeSalnés - CaldasMostrando artigos por etiqueta: Boiro Top of Page

Síguenos en facebook