• Facebook
  • Twitter
  • Rss
  • Plus
CAMBADOS> O patrón maior de Cambados chama á calma sobre a situación so libre marisqueo. Despois de que algúns patrón alertasen da ameaza de falta de produción, e de que moitos mariñeiros decidisen trasladarse á ría de Noia, Ruperto afirma que hai que agardar á reunión coa Consellería para coñecer cal é o estado real dos areais de cara á campaña, que comezará, previsiblemente, en dúas semanas. Ante a inminente apertura da campaña de libre marisqueo, os ánimos dalgúns patróns andan revoltos, debido á falta de resposta da Xunta ás súas peticións de rexeneracións da ría de Arousa. O que provocou que mesmo se alertase da posibilidade da desaparición do libre marisqueo, pola falta de produción. O patrón maior de Cambados, enviou unha mensaxe de tranquilidade, esta mañá, falando con esta casa. Asegura que mentres non haxa a reunión coa Xunta para coñecer o estado actual da ría. O patrón agarda que a reunión se produza esta mesma semana, posto que está previsto comezar a campaña o primeiro día laborable de outubro, como vén sendo habitual. Costa admite que a situación non é boa, pero que prefire ser optimista respecto da campaña. O patrón asegura que as confrarías pediron en tempo e forma á administración unha rexeneración da Ría, que non se fixo aducindo a Xunta motivos técnicos. Con respecto ó traslado de mariñeiros a outras rías, Costa afirma que as causas son económicas.
Publicado en SALNÉS - CALDAS
CAMBADOS> O aforro enerxético é unha prioridade para o concello de Cambados. Por iso, este xoves, o edil de Obras e Servizos da localidade se desprazou ata Castrelo para anunciar que as novas luminarias led instaladas nesa zona permitirán un aforro real de 12.000 euros ao ano.
Publicado en SALNÉS - CALDAS
CAMBADOS> Hoxe comezaron os traballos de construción de beirarrúas no lugar de Burgáns, en Cambados. A obra busca mellorar a seguridade viaria neste entorno, no que se atopa o colexio Enrique Barreiro. O orzamento é de case 73.000 euros e estarán rematadas en tres meses. En tres meses, o lugar de Burgáns contará con novas beirarrúas. O concello de Cambados xa ten en marcha as obras de construción, que tamén mellorarán a capa de rodadura do vial. Segundo explicou Abal, a vía na que se actúa é especialmente transitada, ao conectar unha estrada autonómica cunha provincial. Tamén polas instalacións que se atopan no entorno. Para afondar nesta mellora da seguridade viaria, o concello engadirá unha modificación no proxecto inicial, coa instalación de dous redutores de velocidade no entorno. Os traballos están incluídos no Plan Concellos da Deputación, contan cun orzamento de case 73.000 euros, e teñen un prazo de execución de tres meses.
Publicado en SALNÉS - CALDAS
CAMBADOS> O concello de Cambados denuncia un novo recorte en materia sanitaria no municipio. Durante o mes de setembro, o centro de saúde pechará oito tardes. Dende a concellería de Sanidade, apuntan á falta de substitucións do persoal como motivo, e denuncian a intención privatizadora da Xunta de Galicia. No mes de setembro, os cambadeses verán reducido o horario do seu centro de saúde. Segundo anunciou o SERGAS, o ambulatorio pechará oito tardes; decisión que, segundo apuntan dende o concello, dificulta o acceso á sanidade de moitos veciños. Cordal non ocultou o seu malestar. Para el, esta medida é froito do afán privatizador da Xunta de Galicia respecto da sanidade pública, e un recorte máis nos servizos que padecen en Cambados. Tampouco gusta que dende o goberno autonómico non se notificara ao concello esta medida. Unha mostra máis, asegura, da falta de diálogo do executivo de Alberto Núñez Feijóo. Dende o concello cambadés xa amosaron en varias ocasións a súa oposición á política sanitaria da Xunta. A máis recente, a moción que apoiaron a semana pasada solicitando a retirada do anteproxecto de Lei de Saúde, que convertirá a área sanitaria de O Salnés nun distrito da de Pontevedra.
Publicado en SALNÉS - CALDAS
CAMBADOS> Achegar a realidade laboral ós máis novos, é o obxectivo que persegue o programa “Deseñando o Futuro” da Consellería de Xuventude. En Cambados uns 15 mozos de entre 14 e 18 anos están somerxéndose este verán en distintos oficios para poder decidir sobre o seu futuro laboral e académico. Hoxe tocou visita á Lonxa de Tragove. Chega unha idade na que, ou tes clara unha vocació, ou moitas veces necesitamos de axuda par apoder orientarnos para o futuro laboral e académico. É a idade que teñen estes 15 mozos e mozas de Cambados, de entre 14 e 18 anos, e que forman parte do programa Deseñando o teu Futuro da Consellería de Xuventude. Como vemos, hoxe tocou visita á Lonxa de tragove, onde descubriron as entrañas do traballo diario na rula. Aínda que de momento Carlos e Alicia parece que sentiron máis atracción por outras das profesión que coñeceron ó longo do verán. Todo indica que a lonxa, esta mañá, non acabou de convencelos. No programa Deseñando o teu futuro, coalbora tamén a concellería de Xuventude da capital do albariño.
Publicado en SALNÉS - CALDAS
CAMBADOS> A décimo quinta edición da Concentración Albariño Clásicos trae este ano importantes sorpresas. Ademais de organizar un percorrido de luxo para os participantes, a Ruta do Pai Sarmiento, a celebración durará dous días onde non faltarán os concertos e a gastronomía. A Concentración Albariño de Clásicos, que se celebrará esta fin de semana, cumpre este ano 15 edicións, polo que os seus organizadores quixeron preparar un programa máis especial do habitual. Este desfile de vehículos clásicos polo Salnés será o sábado día 2, pero o domingo día 3 continúa a concentración, xa na praza de Fefiñáns en Cambados, onde o público poderá admiralos durante todo o día. O concello de Cambados considera que o evento é todo un privilexio para o municipio e para a comarca , así como unha oportunidade para dar a coñecer a potencialidade do lugar. Á concentración asisten máis de 100 coches clásicos procedentes de toda Galicia e parte de Portugal.
Publicado en SALNÉS - CALDAS
CAMBADOS> Novo golpe contra o furtivismo. Gardacostas decomisou máis de dúas toneladas de berberecho ilegal. O molusco foi localizado nun control contra estas prácticas que se realizou nun cocedoiro de Cambados procedente de Portugal. Máis de dúas toneladas de berberecho ilegal foron comisados polo Servizo de Gardacostas de Galicia. Os axentes localizaron o molusco durante un control contra o furtivismo realizado nun cocedoiro de Cambados. Na actuación, os axentes inspeccionaron toda a mercadoría das instalacións e comprobaron que había máis de 2.100 quilos de berberecho que carecía de documentación que amparara a súa procedencia, polo que decidiron requisalo. Así as cousas, parece que o destino final do molusco era unha terceira empresa. O operativo enmárcase no conxunto de controis que a diario efectúa o Servizo de Gardacostas para evitar a extracción e comercialización ilegal de produtos pesqueiros e marisqueiros. Só en dúas inspeccións da semana pasada, os axentes comisaron 21 toneladas de peixe.
Publicado en SALNÉS - CALDAS
CAMBADOS> O venres 8 de setembro Cambados acollerá a segunda edición das xornadas da Fundación Manolo Paz. Conferencias e conversas en torno á paisaxe e á súa relación coa arte contemporánea centrarán os contidos da cita, que se desenvolverá durante dous días. Tamén se entregará o segundo premio Fundación Manolo Paz, que este ano recaerá no mecenas e coleccionista Román Pereiro. A Fundación Manolo Paz repite este ano as súas xornadas en Cambados. A cita desenvolverase os días 8 e 9 de setembro, con conferencias e conversas en torno á paisaxe e a súa relación coa arte contemporánea, degustacións gastronómicas da terra e música, entre outras propostas. Unha das primeiras actividades do programa será a entrega do segundo premio Fundación Manolo Paz. Galardón que este ano recaerá no mecenas e coleccionista Román Pereiro. Como principal novidade, esta edición incluirá a exposición "Paisaxes sen título", na que participarán os artistas brasileiros Albano Afonso e Marco Giannotti, a escocesa Emma Crichton, o portugués Baltazar Torres, a valenciá Irene Grau e os galegos Juan López e o propio Manolo Paz. A inscrición nestas xornadas pode realizarse a traves da web da Fundación Manolo Paz.
Publicado en CULTURA
Xoves, 24 Agosto 2017 10:18

Cambados forma ós futuros condutores

CAMBADOS> Aprender a circular seguindo os sinais de tráfico ou entender as indicacións dos axentes, son algunhas das pautas de seguridade viaria que descubriron máis de 200 nenos e nenas de Cambados. Hoxe asistimos á última sesión das xornadas. O obxectivo é que os nenos e nenas do Campamento de Verán de Cambados, aprendan a circular e coñezan as normas de seguridade viaria. En total 200 rapaces de entre 5 e 14 anos articiparon nestas xornadas desde o luns e ata hoxe no Pavillón do Pombal, contando coa colaboración de axentes da policía local. Unhas clases maxistrais da Policía na que os cativos aprenderon lección tan importantes coma estas. Hoxe rematan estas xornadas de seguridade viaria, pero o campamento continúa. De seguro que estes nenos e nenas, aínda que non poidan coller o coche de momento, van axudar a que a mellore a seguridade nas rúas cambadesas.
Publicado en SALNÉS - CALDAS
VILAGARCÍA> A xunta de persoal do Hospital do Salnés busca o apoio dos concellos para defender a área sanitaria. Esta mañá, mantiveron un encontro cos representantes dos concellos de Vilagarcía, Cambados, A Illa e Ribadumia, para trazar unha fronte común contra o anteproxecto de lei sa Xunta. Consideran que dá un paso máis na privatización da sanidade pública, polo que responderán coa mobilización social. A xunta de persoal do Hospital do Salnés buscou alianza cos alcaldes da área sanitaria para defender o centro do anteproxecto de lei que quere levar adiante a Xunta. Unha proposta que, aseguran, é un paso máis na privatización da sanidade pública. A súa postura foi defendida tamén polos alcaldes. Ao encontro acudiron os rexedores de Vilagarcía, Cambados e A Illa de Arousa, ademais dunha edil do concello de Ribadumia. Catoira non puido asistir por problemas de axenda, o mesmo motivo co que desculpou a súa ausencia o alcalde de Vilanova. Un dos primeiros pasos, será elaborar unha moción conxunta para levar aos plenos de todos os concellos que forman parte da área sanitaria de O Salnés. Tamén apostan pola mobilización social. De feito, a xunta de persoal pon a disposición dos que o desexen un texto tipo para presentar suxestións. O vindeiro xoves a xunta de persoal manterá un encontro con concelleiros doutros grupos políticos e cos sindicatos. Tamén buscarán unha folla de ruta común coas áreas sanitarias de Monforte, Burela e O Barco, as outras afectadas polo anteproxecto.
Publicado en SALNÉS - CALDAS
Mércores, 02 Agosto 2017 19:46

O albariño xa volve regar a festa en Cambados

CAMBADOS> Tralo pregón, a atención desprazouse ata o Paseo da Calzada. Incluso antes do corte da cinta que marca, de xeito simbólico, a inauguración oficial da festa, os 42 stands xa traballaban arreo para atender todas as peticións dos primeiros clientes. Unha afluenza de público que tampouco pasou desapercibida para as autoridades. Precisamente, a condición de Cambados como Cidade Europea do Viño non pasou desapercibida. Para a alcaldesa, este feito é un motivo máis para celebrar por todo o alto esta edición número 65 da Festa do Albariño. Para a presidenta provincial, algo que fai máis especial a celebración deste ano. A Conselleira do Medio Rural tamén formou parte da comitiva que abriu a festa. Ángeles Vázquez fixo referencia á alta calidade dos caldos. Unha materia prima que é un dos principais atractivos desta festa. Atendendo á alta afluenza de público que se rexistrou nas pasadas edicións, o Consello Regulador decidiu incrementar o número de cataviños que estarán dispoñibles no Paseo da Calzada. Este ano, os stands poderán repartir ata 35.000 destas coptas que, ademais, contarán co logotipo de Cambados Cidade Europea do Viño 2017, como homenaxe á vila e ao sector. Xa dende hoxe, a festa non parará en Cambados ata o vindeiro domingo. Mañá será a inauguración do Túnel do Viño, que reunirá no Salón José Peña máis de 140 marcas pertencentes a 58 adegas da Denominación de Orixe Rías Baixas.
Publicado en SALNÉS - CALDAS
CAMBADOS> Mentres no Paseo da Calzada comezábanse a formar as primeiras colas nos stands, a edición número 65 da Festa do Albariño arrincaba na praza do concello. Dende o balcón, o actor Matías Varela, sueco de nacemento pero cambadés de sentimento, dirixíase aos seus veciños. Coa ollada fixa das autoridades que o observaban dende a praza e continuamente interrompido polos aplausos do público, Matías Varela loubou as características de Cambados como pobo e, como non dos seus viños. Caldos que, asegurou, son únicos no mundo. O pregoeiro presumiu de raíces cambadesas, tirou de anécdotas e recordos e soubo gañar a simpatía do público. Deste xeito, un dos pregoeiros máis internacionais que tivo a Festa encargábase de marcar o arranque da 65 edición da Festa do Albariño de Cambados.
Publicado en SALNÉS - CALDAS
Páxina 1 de 20
HomeSalnés - CaldasMostrando artigos por etiqueta: Cambados Top of Page

Síguenos en facebook