• Facebook
  • Twitter
  • Rss
  • Plus
RIBEIRA> Para os nacionalistas a actitude do goberno local non está a ser a apropiada, acusándoo de actuar con pasividade ante esta problemática. Atendendo a unha denuncia dos propios veciños da zona, o BNG vén de facerse eco dun novo vertido de augas residuais no río Listres, nos Areeiros. Segundo os nacionalistas o foco do problema parece ser, unha vez máis, o aliviadoiro do tanque de tormenta existente no lugar. O BNG criticou a pasividade do Concello con este problema e as escasas solucións que se lles están a dar ós veciños afectados. A través dun escrito presentado no Concello, o BNG pídelle ó goberno local que solicite a Augas de Galicia o informe realizado sobre esta vertedura e se ten pensado esixir algunha responsabilidade a quen corresponda por este suceso.
BOIRO> O incendio afectou a varias zonas da parroquia de Cures. Durante a tarde-noite chegou a activarse a situación dous debido á proximidade das lapas ás vivendas. Un dos primeiros focos producíase na zona da Figueira. Ó mediodía, a columna de fume e lapas, avanzaba a velocidade de vertixe pola serra do Barbanza, axudada polas altas temperaturas e a forza do aire. Os medios terrestres apenas podían facer nada nesa zona de difícil acceso, e os aéreos, tampouco, debido ás condicións de vento existente. Ás nove da noite a situación empeorou. Nese tempo e segundo as primeiras estimacións de Medio Rural levaban ardidas xa máis de noventa hectáreas. Xa era, sen dúbida, o maior incendio dos que se levan rexistrado na comarca no que vai de ano. O lume estaba totalmente incontrolado e a situación facíase, cada vez, máis complicada xa que as lapas aproximábanse a varios núcleos de vivendas como é o caso de Balteiro e Lidón. Foi nese momento, entrada xa a noite cando se decretou o nivel de alerta dous debido á proximidade do lume a casa. Para os veciños deste último núcleo boirense foron momentos de gran tensión e medo, xa que as lapas avanzaban cara as súas casas. A pesar do medo vivido, non houbo que lamentar danos persoais, e tampouco tiveron que desaloxar as súas vivendas, grazas ó traballo dos equipos de emerxencias, que pasaron toda a noite na zona. O incendio de Cures non foi o único que se rexistraba esta pasada fin de semana no Barbanza. En Ribeira producíanse tamén varios lumes, aínda que a menor escala, que afectaron á zona de salmón, en Oleiros, e tamén a Palmeira, obrigando a mobilizar a estas dúas zonas a varios equipos de extinción.
Luns, 16 Outubro 2017 19:35

O Arousa lévase ó derbi ante o Boiro

BOIRO> Os vilagarciáns impúñanse ó Boiro en Barraña por cero goles a dous. Os tantos dos de Jorge Otero foron obra de Yerai e Javi Pazos. Cunha ampla presenza de afeccionados nas bancadas do municipal de Barraña, onte domingo disputouse o derbi comarcal entre o Boiro e o Arousa, que rematou co resultado final de cero a dous. Aínda así, e a pesar da diferenza no marcador, resultou un partido vibrante, no que os boirenses non foron inferiores ó seu rival. No inicio os de Jorge Otero sairon máis enchufados ó partido, levando o dominio no xogo. Foi nestes primeiros minutos de xogo cando se producía ademais a nota tráxica, coa lesión de Taboada, despois de recibir un testarazo de Sidibé na disputa dun balón aéreo. O xogador boirense tivo que abandonar o partido e foi trasladado a un centro hospitalario onde en observacións pasou a noite, aínda que á mañá xa foi dado de alta. O lance obrigou a suspender o choque uns minutos. O parón favoreceu ó Boiro que a partir de aí iniciou o seu dominio. A pouco para o remate da primeira parte producíase tamén unha das xogadas claves, que puido cambiar o signo do partido. O brasileiro Igor caía dentro da área tras un choque, aínda que o colexiado non interpretou nada. A xogada foi moi protestada polos locais e tamén na bancada. Eran os mellores momentos do Boiro. Co resultado de cero a cero chegaríase ó descanso. Xa na segunda parte máis do mesmo. Os dous equipos intentaban facerse co dominio do xogo pero sen apenas perigo na área rival. A falta de quince minutos para o final do partido, o Arousa conseguiría adiantarse. Unha xogada por banda de Suso, Javi Pazos e Yerai, acabou co balón nos pés deste último que de tiro cruzado enviaba o balón ó fondo das mallas. Era o cero a un. O tanto deixou noqueado ó Boiro que tres minutos máis tarde vería de novo perforada a súa portería. Esta vez Javi Pazos, que recibía só no segundo pau, enviaba o balón a dentro da portería. Sen tempo para a recuperación, o Boiro vía como se lle escapaba o partido. Os tres puntos sitúan ó Arousa na novena praza con catorce puntos, os mesmos que ten o Boiro, que agora se ve superado polos vilagarciáns na clasificación. Na próxima xornada, o Arousa recibirá na Lomba ó Barbadás, mentres que o Boiro enfrontarase ó Alondras.
BOIRO> A obra, que será executada en dúas fases, ascende a uns 142 mil euros, que irán con cargo ó remanente de tesourería do pasado exercicio 2016. Trátase dunha das rúas do casco urbano boirense máis degradadas, e que a día de hoxe presenta un peor estado, de aí que o executivo decidira realizar unha actuación importante que supoña a renovación non só estética, senón tamén de mellora de servizos, co separativo de auga e saneamento e a instalación de novas canalizacións. A reforma virá a poñer fin definitivo tamén ós os fallos existentes na rede de sumidoiros e ás continuas roturas nas tubaxes da rede de abastecemento de auga. A actuación enmárcase no plan deseñado polo Concello de cara a ir humanizando, na medida do posible, o casco urbano, como se fixo anteriormente coas rúas Norberto Pizjuan e Pablo Iglesias, na rúa Bao, na Estatuto de Galicia ou na Fernández Mato entre outras. O inicio das obras será inmediato, xa que a actuación deberá estar rematada a finais deste mesmo ano.
Venres, 13 Outubro 2017 16:16

Novo acto vandálico nos muíños de Amendo

RIBEIRA> Nesta ocasión os destrozos afectaron ó tellado, ás portas e ó interior dun dos muíños alí emprazados. Nesta ocasión foi unha veciña que transitaba polo lugar a que deu a voz de alarma, informando á propietaria do acontecido. Unha vez alí, a dona do muíño comprobou cos seus propios ollos o estado no que se atopaban as instalacións, restauradas hai algúns anos da man da consellería de Medio Ambiente. A varanda de madeira existente na zona de acceso ós muíños fora arrancada, como tamén o foron varias das portas que dan acceso ó seu interior. Aínda así os danos máis graves producíanse na cuberta, onde os vándalos deixaron un gran buraco despois de romper e destrozar numerosas tellas. Á espera dunha valoración máis pormenorizada por parte de técnicos especialistas en restauración, para determinar con exactitude o alcance dos danos, e se puideron mesmo afectar a partes importantes do muíño, a propietaria xa formalizou esta mañá a correspondente denuncia na comisaría da Policía Nacional cuxos axentes xa iniciaron unha investigación para tratar de esclarecer todo o acontecido e dar co posible ou posibles autores destes feitos.
RIBEIRA> A cita, organizada polo club Natural Sport, reunirá na localidade a máis dun milleiro de taekwondistas chegados dende diferentes clubs de Galicia, España e tamén Portugal. Máis dun milleiro de taekwondistas chegados dende diferentes clubs de ámbito autonómico, nacional e mesmo internacional, coa presenza de clubs portugueses, daranse cita esta próxima fin de semana no pavillón polideportivo da Fieiteira para tomar parte na décimo sétima edición do Campionato Internacional Cidade de Riveira. A cita, que será puntuable a nivel galego e nacional, aglutinará a diversas modalidades como é o combate, a técnica, o freestyle ou mesmo as exhibicións. Dende a organización destacaron o alto nivel participativo neste torneo, así como tamén as novidades dos sistemas electrónicos a empregar na competición. Dende o Concello animaron a acudir durante a fin de semana á Fieiteira a presenzar un espectáculo deportivo do máis alto nivel. Dende a organización destacaron a colaboración do Concello, así como tamén das distintas empresas patrocinadoras que fan posible este campeonato. Dende o Natural tamén anunciaron que a Federación lle outorgou a eles a organización do próximo Campionato Galego Absoluto a celebrar o 16 de decembro.
BOIRO> Os nacionalistas solicitaranlle á Xunta a dotación de pasos de peóns e a instalación de máis elementos de seguridade na zona. Facéndose eco dunha solicitude formulada xa polo grupo municipal, que mesmo resultou aprobada por unanimidade hai varios meses no pleno, o BNG levará ó Parlamento os problemas de seguridade viaria na zona de Vilariño. Para o BNG a obra está incompleta, polo que reclamarán que se corrixan as eivas detectadas, antes de que se produza unha desgraza. Dende o BNG denuncian que, en xeral, nas estradas autonómicas con este tipo de actuacións, incluídas no denominado Plan de Sendas, non se están a resolver as medidas de seguridade para as persoas, polo que piden a instalación de pasos de peóns seguros, elevados, ben iluminados e en ocasións regulados con semáforos, para evitar posibles accidentes.
BOIRO> A iniciativa forma parte do proxecto da ‘República Creativa’ que promove o Concello A directora xeral de Xuventude, Participación e Voluntariado, Cecilia Vázquez, participou con alumnado do IES A Cachada de Boiro a unha das sesións de 'mentoring' que se están a levar a cabo no propio instituto e nas que participan empresarios do mundo das artes que explican a súa experiencia. Esta actividade enmárcase no proxecto ‘República Creativa” que está a desenvolver o propio Concello ó abeiro da convocatoria de axudas para a posta en marcha de iniciativas locais dirixidas á xuventude da consellería de Política Social. Segundo sinalou o propio alcalde, Xoán Xosé Dieste, unha das principais finalidades desta iniciativa impulsada dende o Concello é a de mellorar a empregabilidade da mocidade achegándolle experiencias profesionais de éxito próximas, proporcionándolles ós mozos poder coñecer novos nichos de emprego e tratando de fomentar a posta en marcha de iniciativas novidosas. A Dirección Xeral de Xuventude, Participación e Voluntariado apoiou este proxecto cunha achega duns seis mil euros.
RIBEIRA> As actuacións, entre as que figura a substitución dun dos módulos do dique flotante que se atopaba deteriorado, terán un custe duns 30 mil euros. Atendendo a unha demanda trasladada polo patrón maior, Miguel Franco, Portos de Galicia desenvolverá diversas obras de mellora nas instalacións do porto de Palmeira. Trátase, en definitiva, de pequenas actuacións propias dos labores de mantemento e conservación que o ente autonómico vén desenvolvendo de xeito periódico nas instalacións portuarias. As actuacións, que serán realizadas de inmediato, contarán cun investimento duns 30 mil euros.
BOIRO> O proxecto deseñado polo executivo boirense contará cun investimento de máis de 182 mil euros. Despois de numerosos atrancos que ó longo destes últimos anos impediron levalo a cabo, o executivo boirense impulsará a terceira fase do proxecto de recuperación e rexeneración ambiental no río Coroño. A actuación é unha vella demanda dos veciños da zona, ó tratarse dun espazo degradado onde existen varios puntos de vertido que agora se verán erradicados definitivamente. O proxecto, que conta cun orzamento duns 182 mil euros, podería estar xa rematado antes de finais da presente lexislatura. Con este proxecto o executivo boirense trata de revalorizar esta zona privilexiada, de gran beleza turística e medioambiental, na que se inclúen un parque infantil, un parque biosaudable e un parque multiaventura para nenos.
BARBANZA> O obxectivo da campaña non é outro que tratar de minimizalo impacto desta enfermidade na poboación, especialmente nos grupos de maior risco. A campaña de vacinación antigripal deste ano iniciarase o vindeiro 23 de outubro e prolongarase ata o 29 de decembro. Neste tempo a consellería de Sanidade pretende distribuír unhas 560 mil vacinas entre a poboación, dirixíndose especialmente aqueles grupos de idade de maior risco como poden ser persoas maiores de sesenta anos. Como medida extraordinaria este ano sanidade adquiriu unhas trinta mil vacinas mais, coa previsión de mellorar os resultados da campaña do ano anterior, mantendo a oferta de vacinación a tódalas persoas incluídas nos grupos de risco, de xeito totalmente gratuíto, co fin de aumentar as coberturas. A consellería de Sanidade conta con 900 puntos de vacinación repartidos por toda a comunidade: centros de saúde e hospitais da rede Sergas, centros sanitarios privados, residencias da 3ª idade e outros centros con residentes susceptibles de beneficiarse desta vacinación, como poden ser centros penitenciarios, entre outros.
Martes, 03 Outubro 2017 15:28

Sube o paro en Galicia e tamén en Arousa

AROUSA> O número de parados sitúase en Arousa nas 14.386 persoas, 733 persoas máis que no mes anterior. Setembro volve a deixar cifras negativas en canto á creación de emprego. O número de desempregados volve a medrar en Arousa, segundo os datos do ministerio de Emprego, situándose nas 14.386 persoas, 733 máis que no mes anterior. Uns datos que dende a CIG agardaban, unha vez rematada a tempada estival, e con ela a rescisión de moitos contratos temporais en sectores como o comercio e a hostalería. No Salnés destruíronse durante o pasado mes de setembro 543 empregos, sendo os concellos do Grove e Cambados os que presentan un índice maior de desempregados con 158 e 107 parados máis respectivamente. Outros Concellos desta comarca nos que aumentou tamén o paro foron Meaño con 69, Ribadumia 49 e Vilagarcía 44. Aínda así non son todos datos negativos, houbo municipios coma Catoira, 11, Valga, 9, e Pontecesures, 2, nos que si se creou emprego. En canto ás comarcas do Barbanza e Muros-Noia a situación é moi semellante á do Salnés, aumentando o número de parados o pasado mes de setembro en 190 persoas. Por concellos onde máis se destruíu emprego foi Boiro con 69 desempregados máis, seguido de Pobra do Caramiñal con 47 e Ribeira con 44. O dato positivo obtémolo en Noia onde si se xerou emprego con respecto ó mes anterior, cun total de nove persoas máis que atoparon traballo.
Páxina 1 de 266
HomeSUCESOSMostrando artigos por etiqueta: Barbanza Top of Page

Síguenos en facebook